Stúlkurnar köstuðu frá sér tösku með fartölvu og síma á miðjum flótta

Önnur stúlkan sem flúði lögregluna á léttu bifhjóli ásamt vinkonu sinni, kastaði frá sér tösku sem reyndist innihalda fartölvu, síma og fleira samkvæmt upplýsingum frá lögreglu.

Það var laust fyrir miðnætti sem lögreglan veitti númerslausu léttu bifhjóli eftirtekt, en því var ekið eftir gangstétt á Krókhálsi.

Á hjólinu voru ökumaður og farþegi. Lögreglumenn hugðust ræða við ökumann hjólsins, en hann sinnti ekki stöðvunarmerkjum og hélt áfram akstri.

Nærstaddar lögreglubifreiðar voru kallaðar til  þar sem fullsýnt þótti að ökumaðurinn myndi ekki stöðva aksturinn og ítrekað var reynt að stöðva akstur hjólsins, meðal annars með því að leggja lögreglubifreiðunum þannig að erfitt yrði að komast framhjá þeim, en það dugði ekki til.

Hjólinu var að lokum ekið utan í ljósastaur og við það féllu ökumaður og farþegi af því.

Í ljós kom að þarna voru á ferð tvær unglingsstúlkur.

Þær létu ófriðlega og veittust að lögreglumönnunum og neituðu að segja á sér deili samkvæmt lögreglunni. Síðar kom í ljós að þær voru fæddar 1999.

Stúlkurnar sluppu ómeiddar, en voru til öryggis fluttar til skoðunar á slysadeild þangað sem foreldar þeirra sóttu þær. Samkvæmt upplýsingum frá lögreglu kom í ljós að tölvan og síminn var í þeirra eigu.

Aðstandandi annarar stúlkunnar sendi fréttastofu póst þar sem því var haldið fram að lögreglan hefði beitt stúlkurnar harðræði. Þar er því meðal annars haldið fram að lögreglan hafi sparkað í eina stúlkuna þar sem hún lá á jörðinni.

Svo sagði í póstinum:

„Sú sem ók hjólinu rotaðist og þurfti að kasta upp en lögreglan sinnti því á engann hátt. Tek það fram að þetta eru 13 ára gömul börn.“

Fréttaljósmyndari var á vettvangi en í samtali við fréttastofu sagðist sá ekki hafa orðið vitni af því að stúlkurnar hafi verið beittar slíku ofbeldi.

Aðstandandinn vildi ekki tjá sig frekar um málið við fréttastofu þegar eftir því var leitað.