Sirkusþorp rís í Reykjavík

Sirkusþorp rís nú í Vatnsmýrinni í Reykjavík. Volcano sirkushátíð hefst þar eftir nokkra daga og þá iðar þorpið af lífi og furðuverum sem koma víða að úr veröldinni.

Það eru Norræna húsið og Cirkus Xanti frá Noregi sem standa að hátíðinni sem hefst 4. júlí og stendur til  14. júlí. Sjö sirkustjöld mynda þorpið í Vatnsmýrinni og eru þrjú þeirra þegar komin upp og eitt að rísa.

„Í stærsta tjaldinu komast 400 manns fyrir, það er 300 manna tjald að rísa, síðan erum við með kaffihúsatjald og  ýmis önnur tjöld, minni sýningar- og sölutjöld. Þannig að þetta verður ótrúlega skemmtilegt," segir Kristín Scheving verkefnastjóri í Norræna húsinu.

Hátíðin ber nafnið Volcano, eins og áður segir,  og tjöldin hafa hlotið heiti íslenskra eldfjalla. Stærsta sýningartjaldið er kallað Eyjafjallajökull.

„Annað tjald heitir Hekla og svo er Katla og það er Volcano kaffihús.  Askja er líka og Grímsvötn held ég að eitt tjaldið okkar heiti," segir Kristín.

Þetta er í fyrsta sinn sem slík hátíð er haldin á Íslandi en hingað koma og sýna listir sínar sextán sirkushópar frá Evrópu og víðar að. Einn frægasti sirkus Norðurlandanna, Cirkus Cirkör, kemur með sýninguna Wear it Like a Crown sem er sett upp í samstarfi við Borgarleikhúsið.

„Þetta er náttúrulega ný-sirkus, það eru engin dýr í svoleiðis sirkus. Það er maðurinn sem er þarna á sviði  og sýnir listir sínar," segir Kristín spurð hvort ljón og fílar komið eitthvað við sögu.

Íslendingar munu eiga sína fulltrúa á hátíðinni því Sirkus Ísland verður með fjórar sýningar, meðal annars nýja sýningu, Heima er best, sem verður sýnd í stærsta tjaldinu.

Upplýsingar um hátíðina má finna á vefsíðu Norræna hússins.