Kveikur beint í topp tíu

Kveikur, nýjasta plata Sigur Rósar, fór beint í níunda sæti á breska plötulistanum í gær. Tónlistarmenn á borð við Kanye West, Daft Punk og Black Sabbath eru ofar á listanum. Þetta er sjöunda plata Sigur Rósar og sú þriðja sem kemst inn á topp tíu á listanum.

Kveikur kom út 17. júní. Platan hefur fengið mjög góð viðbrögð hjá aðdáendum sveitarinnar og prýðilega dóma gagnrýnenda. Í viðtali við Fréttablaðið fyrr í mánuðinum sagði Orri Páll Dýrason, trommari sveitarinnar, að hljómsveitarmeðlimir hafi fengið mikla þörf til að gera eitthvað nýtt eftir að hljómborðsleikarinn Kjartan Sveinsson hætti eftir fimmtán ár í bandinu.

„Við vorum orðnir svolítið leiðir. Við fengum rosalega þörf til að gera eitthvað nýtt, eitthvað allt annað og nota aðrar aðferðir. Kjartan var náttúrulega hættur þannig að það breyttist helling við það líka,“ sagði Orri Páll.



Hér er hægt að sjá listann í heild sinni.