Nokkuð hefur dregið úr verkefnum lögmanna á síðustu mánuðum eftir mikla fjölgun í kjölfar kreppunnar. Formaður Lögmannafélags Íslands óttast að visst tómarúm myndist í stétt lögmanna með þessu og að lögsóknum fjölgi um leið.
Lögmenn landsins eru rétt rúmlega þúsund talsins, eða einn lögmaður á hverja 320 íbúa. Við fyrstu sýn virðist þetta hlutfall vera nokkuð rökrétt en málin flækjast þegar litið er til nágrannalanda okkar.
Í Noregi er hlutfallið einn lögmaður á hverja 630 íbúa, í Danmörku einn á hverja 950 og í Svíþjóð einn á hverja 1.800. Það er því óhætt að segja að það séu margfalt fleiri lögmenn á Íslandi en víðast hvar annars staðar.
Ljóst er að fjölgun í stétt lögmanna helst í hendur við útskrifaða nemendur af lagadeildum, sem í dag eru fjórar. En það útskýrir ekki þörfina fyrir þessum fjölmenna hópi lögmanna.
„Þjóðfélagið hefur auðvitað breyst töluvert á síðasta áratug," segir Jónas Þór Guðmundsson, hæstaréttarlögmaður. „Regluverkið er að verða flóknara með auknum viðskiptum við útlönd og alþjóðaviðskiptum. Á þessum tíma hefur verið meira rými fyrir lögmenn en áður. En vitum auðvitað ekki hvaða stefnu þessi markaður mun taka."
Jónas Þór bendir á að eftir hrun hafi mörg stór verkefni komið inn á borð lögmanna. Mörg af þeim málum hafa nú verið leidd til lykta og því sé hætta á ákveðið tómarúm myndist í kjölfarið.
„Nú er farið að draga úr þeim og það er ómögulegt að segja hvernig þróunin verður. Við heyrum það að nú sé orðið erfiðara fyrir nýútskrifaða lögfræðinga að fá vinnu," segir Jónas Þór og bætir við: „Það er ekki ólíklegt að með auknum fjölda lögmanna fylgi fleiri málsóknir."
Fram
ÍBV
