Ólína í atvinnuleit

"Kæru vinir - í dag hefst atvinnuleitin og hér með set ég þreifarana út. Mér er fleygt niður á ýmislegt og er opin fyrir nánast öllu. Ég þigg allar velviljaðar ábendingar og liðsinni. Hér er tengill á gagnagrunninn minn á Kvennaslóðum."

Svo hljóðar stöðuuppfærsla Ólínu Þorvarðardóttur á Facebook. Hún segist hafa verið að ýta á "send" þegar blaðamaður Vísis hringdi til að forvitnast um atvinnuleitina.

Brettir upp ermar í atvinnuleit

"Ég á þrjú þúsund vini á Facebook og ef maður er í alvöru atvinnuleit þá lætur maður vini vita af því. Ég er náttúrlega á launum í þrjá mánuði eins og allir þeir þingmenn sem setið hafa í eitt kjörtímabil. En, svo er það búið og þá er eins gott að bretta upp ermar og skima í kringum sig," segir Ólína.

Einkum er það tvennt sem Ólína horfir til varðandi atvinnumálin og vísar til reynslu sinnar sem háskólakennari til margra ára og svo þess að hafa verið skólameistari menntaskólans á Ísafirði. "Mig langar hálft í hvoru að sinna fræðimennskunni aftur en ég er með doktorspróf í íslenskum bókmenntum. Og ég hef mest verið í því um mína daga; mennta- og skólamálum. Og svo lít ég til stjórnunarstarfa en ég hef sinnt þeim öðrum þræði."



Erfiðasta kjörtímabil þingsögunnar

Ólína segir það blendnar tilfinningar að kveðja þingið; mikil lífreynsla hafi verið því samfara að sitja á þingi þetta "einkennilega kjörtímabil, sennilega það erfiðasta í þingsögunni," eins og hún orðar það. En, hún er jafnframt þakklát fyrir þá lífsreynslu og þeirri að hafa kynnst fólki utan þings sem innan. Hún segir jafnframt að vonbrigði hafi verið að ná ekki fram breytingum á fiskveiðistjórnunarkerfinu sem og stjórnarskrármálinu, eins og lofað hafði verið. En, Ólína er einnig stolt af ýmsu sem fram náðist eins og því að ná niður halla ríkissjóðs og minnka atvinnleysið um helming.

"Mikill árangur sem byggja má á nýja velsæld fyrir Íslendinga og ég er ánægð með þetta. En, er uggandi ef sjálfstæðismenn eru að fara inn í ríkisstjórn með allar sínar skattalækkanir að árangurinn brenni upp í verðbólguskotum. Stöðugleika efnahagslífsins er þar ógnað."

Og hér er tengill Ólínu á Kvennaslóðir.