Liðsfélagar lögðu upp flest mörk

FH-ingarnir Ólafur Páll Snorrason og Sam Tillen gáfu flestar stoðsendingar í Pepsi-deild karla í sumar en verðlaunin fyrir stoðsendingar voru afhent í gær í útgáfuteiti bókarinnar Íslensk knattspyrna 2013.

FH-ingurinn Ólafur Páll Snorrason gaf flestar stoðsendingar í Pepsi-deild karla í fótbolta sumarið 2013 eða einni fleiri en liðsfélagi hans Sam Tillen. Saman gáfu þeir félagar 21 stoðsendingu á félaga sína í FH-liðinu.

Stjörnustúlkan Rúna Sif Stefánsdóttir gaf flestar stoðsendingar hjá konunum, sextán, eða tveimur fleiri en liðsfélagi hennar og markadrottning deildarinnar, Harpa Þorsteinsdóttir.

Víðir Sigurðsson og bókaútgáfan Tindur afhentu í gær verðlaun fyrir flestar stoðsendingar í deildunum í tilefni af útgáfu bókarinnar Íslensk knattspyrna 2013.

Það er ekki á hverju sumri sem tveir liðsfélagar leggja upp flest mörk í úrvalsdeild karla í fótbolta og Fréttablaðið skoðaði aðeins nánar stoðsendingar FH-inganna.

Hér að neðan má sjá samanburð á stoðsendingunum Ólafs og Sam í Pepsi-deild karla sumarið 2013. Stoðsendingar Ólafs Páls eru vinstra megin á vellinum (4 úr horni, 4 eftir fyrirgjafir, 1 eftir aukaspyrnu og 2 með öðrum hætti) en stoðsendingar Sam Tillen eru sundurliðaðar hægra megin (7 úr horni, 2 eftir fyrirgjafir og 1 eftir aukaspyrnu).

Þetta er í annað skiptið sem tveir liðsfélagar ná því að brjóta tíu stoðsendinga múrinn á sama sumri. KR-ingarnir Guðmundur Benediktsson og Gunnar Örn Jónsson náðu því 2009. Þetta er í þriðja sinn sem Ólafur Páll gefur flestar stoðsendingar á tímabili en hann var einnig með flestar stoðsendingar 2005 og 2011. Það eru bara Haraldur Ingólfsson (5 sinnum) og Guðmundur Benediktsson (3 sinnum) sem hafa náð því síðan byrjað var að taka stoðsendingar saman sumarið 1992.

Sam Tillen spilaði sitt fyrsta tímabil með FH og fór að raða inn stoðsendingunum seinni hluta móts. Ólafur Páll var því nánast búinn að missa titilinn til félaga síns á lokasprettinum því Sam gaf alls átta stoðsendingar í seinni umferðinni. Ólafur Páll gaf aftur á móti meira en helming stoðsendinga sinna í júnímánuði.

Ólafur Páll jafnaði met Guðmundar Benediktssonar með því að gefa tíu stoðsendingar eða fleiri á sínu þriðja tímabili en því náði FH-ingurinn einnig þegar hann vann stoðsendingatitilinn í hin tvö skiptin. Guðmundur Benediktsson afrekaði þetta tvisvar með KR (1999 og 2009) og einu sinni með Val (2005).

Ólafur Páll og Sam Tillen voru einnig þeir leikmenn sem áttu þátt í undirbúningi flestra marka. Þar eru taldar með sendingar sem eiga beinan þátt í marki án þess að vera síðasta sending á þann sem skorar. Ólafur Páll kom að fimmtán mörkum en Tillen fjórtán.