Málinu líklegast áfrýjað

Menntamálaráðherra gerir fastlega ráð fyrir því að úrskurði Héraðsdóms Reykjavíkur um úthlutunarreglur Lánasjóðs íslenskra námsmanna  verði áfrýjað til Hæstaréttar. Hann segir að á næstu dögum verði unnið að því að leysa úr þeirri stöðu sem upp er komin.

Héraðsdómur Reykjavíkur kvað upp þann úrskurð í gær að Lánasjóði íslenskra námsmanna (LÍN) hafi verið óheimilt að breyta lánareglum sjóðsins á þann veg að krafa væri gerð um að námsmenn ljúki 22 einingum á misseri til að fá úthlutað námsláni úr sjóðnum, í stað 18 eininga áður.

Menntamálaráðherra gerir fastlega ráð fyrir því að málinu verði áfrýjað til Hæstaréttar þó hann hafi ekki farið yfir það ennþá í smáatriðum. „Ég get ímyndað mér að það sé nú eitthvert fordæmisgildi þarna sem að gæti verið nauðsynlegt að fá þá á hreint hvort að þessi niðurstaða standi eða ekki. Ég á því svona frekar von  á því að það verði gert,“ segir Ilugi.

Illugi segir að dómurinn breyti engu um þá stöðu að halli á ríkissjóði er áfram til staðar og að ráðuneytið verði að skera niður. „Þannig að við verðum þá að finna aðra leið til að fást við þetta.“ segir hann.

Drög fyrri stjórnar LÍN að úthlutunarreglum fyrir skólaárið 2013-14 voru sendar menntamálaráðuneytinu 29. apríl síðastliðinn og eftir yfirferð voru þær ekki staðfestar af þáverandi menntamálaráðherra, þar sem verulegur vafi lá fyrir um getu LÍN til að fjármagna breyttar úthlutunarreglur.

Endurskoðuð tillaga núverandi stjórnar LÍN  barst svo ráðuneytinu 25. júní og var  staðfest af núverandi menntamálaráðherra 9. júlí. Hann er á því að aðgerðin um úthlutunarreglurnar hafi verið skynsamleg. „En það sem mér sýnist dómarinn vera að segja að aðgerðin hefði þurft að liggja fyrir í það minnsta 1. Júní, en núverandi stjórn sjóðsins var ekki sett fyrr en 13. Júní, ef ég man rétt og núverandi ríkisstjórn komst til valda örfáum dögum fyrir 1. Júní,“ segir Illugi.

Illugi segir að unnið verði á næstu dögum við að finna lausn á þeirri stöðu sem nú er komin upp.