Dómur um Icesave kveðinn upp 28. janúar

Dómur EFTA-dómstólsins í Icesave málinu, samningsbrotamáli sem eftirlitsstofnun EFTA höfðaði gegn íslenska ríkinu, verður kveðinn upp hinn 28. janúar næst komandi.

Málið var höfðað á hendur íslenska ríkinu af ESA, eftirlitsstofnun EFTA, hinn 15. desember 2011 og snýst um meint samningsbrot íslenska ríkisins vegna tilskipunar 94/19 um innistæðutryggingar,

Í því er tekist á um svokallaða árangursskyldu íslenska ríkisins vegna tilskipunarinnar, þ.e að Ísland hafi brotið gegn henni með því að gera ekki upp lágmarkstryggingu, alls 20.887 evrur, við hollenska og breska sparifjáreigendur sem áttu innistæður á Icesave-reikningunum í þessum löndum. Og jafnframt fyrir brot á 4. grein EES-samningsins sem fjallar um bann við mismunun eftir þjóðerni.

Auk málshöfðunar ESA stefndi framkvæmdastjórn Evrópusambandsins sér inn í málið með meðalgöngustefnu, en hún er heimil þriðja aðila sem telur sig eiga hagsmuna að gæta. Þannig vildi ESB gæta hagsmuna sinna.

Málið var flutt hinn 18. september síðastliðinn og EFTA-dómstóllinn tilkynnti í morgun að dómsuppsaga yrði hinn 28. janúar næstkomandi. Í málinu voru ekki gerðar dómkröfur í peningum, enda fjallar málið aðeins um mögulegt samningsbrot Íslands. Tapi íslenska ríkið hins vegar málinu gæti það orðið grundvöllur skaðabótakröfu á hendur því en mál vegna hennar þarf að höfða fyrir íslenskum dómstólum því varnarþing Íslands er hér á landi. Þá þurfa bresk og hollensk stjórnvöld jafnframt að sanna tjón sitt vegna slíkrar kröfu.

Þess skal getið að samkvæmt síðasta uppfærða mati á eignum þrotabús Landsbankans duga eignir búsins fyrir meira en 100 prósent forgangskrafna, þar með talinna krafna vegna innistæðna.

Dómurinn verður kveðinn upp klukkan 11:30 að staðartíma í Lúxemborg eða klukkan 10:30 að íslenskum tíma.