Partýstjórinn býður upp í dans

Partýstjórinn og útvarpsmaðurinn Ásgeir Páll heldur jólaball á Spot í Kópavogi klukkan 11 í kvöld.

„Lögð verður áhersla á hágæða skífuþeytingar fyrir fullorðna unglinga sem eru þyrstir í að dilla skrokknum við taktfasta slagara,“ segir Ásgeir Páll um ballið.



Öllu verður tjaldað til að gera kvöldið eftirminnilegt að sögn Ásgeirs.

„Hágæða hljóðkerfi, ljós og reykur sjá um að framkalla magnaða klúbbastemmingu,“ segir partýstjórinn.



Músik frá sjöunda, áttunda, níunda og tíunda áratugnum verður í forgrunni í bland við það allra vinsælasta hverju sinni.

„Þar sem stutt er til jóla ætla Partýstjórinn og SPOT að bjóða FRÍTT á þetta stuðball,“ segir Ásgeir Páll, en hann hefur stýrt Partývaktinni á Bylgjunni svo árum skiptir.

„Ég hef meðfram því komið fram sem diskótekari í einkasamkvæmum. Ég hef í gegnum tíðina verið spurður að því hvort ég vilji ekki koma fram á klúbbum bæjarins en ekki látið það eftir mér fyrr en nú og ætla að halda ball á Spot í kvöld strax að aflokinni Partývaktinni,“ bætir hann við.  

„Eins og á Partývaktinni tökum við á móti óskalögum í kvöld og ætlum að nýta til þess tölvutæknina, en á síðu Partýstjórans geta ballgestir komið óskalögum sínum á framfæri og þurfa því ekki að druslast upp á stórt sviðið á Spot til þess arna,“ segir Ásgeir Páll og hvetur sem flesta til að mæta á svæðið.