Segir Ísland vera paradís fyrir uppljóstrara

Í grein sem birtist á vefsíðu The Atlantic í vikunni veltir blaðamaðurinn Olga Khasan því fyrir sér hvers vegna uppljóstrarar sæki svo sterkt í að leita hælis á Íslandi. Hún byrjar á að minnast á viðtal The Guardian við Edward Snowden þar sem hann lýsir því yfir að hann vilji sækja pólitískt hæli hér á landi, en Snowden  ljóstraði nýlega upp um persónunjósnir bandarísku þjóðaröryggisstofnunarinnar, NSA.

Khasan varpar því fram að Ísland sé þekkt fyrir frjálsræði og að Wikileaks hafi upphaflega verið stofnað hér á landi. Þá hafi Íslendingar skotið pólitísku skjólhúsi yfir Bobby Fisher til dauðadags.

Blaðamaðurinn talar um að á Íslandi séu fjölmiðlavænustu lög í heimi og að landið sé í raun algjör paradís fyrir rannsóknarblaðamenn. Þetta hafi gert Ísland að kjörnum stað fyrir Wikileaks að halda úti starfssemi sinni, og  aðrar alþjóðlegar fréttaveitur hafi jafnvel íhugað að færa starfsemi sína til landsins.

Khasan kemur sérstaklega inn á Pírataflokkinn í umfjöllun sinni og segir frá því að honum hafi tekist að koma þremur mönnum inn á íslenska þingið. Þeir aðilar séu tilbúnir að gera allt sem í þeirra valdi stendur til að veita Edward Snowden pólitískt hæli á landinu. Snowden hefur þó ekki enn sótt formlega um hæli.

Greinin endar þó á léttu nótunum þar sem blamaðurinn segir að ofan á allt saman þurfti Íslendingar að takast á við álfafaraldur.