Erfitt að meta umfang vandans

Erfitt er að meta umfang vandans á Norður- og Austurlandi, sem skapast hefur vegna mikilla snjóþyngsla. Fram hefur komið að bændur sjá fram á erfið verkefni framundan vegna þess að hætta er á kali í túnum. Sumir telja bændur telja jafnvel að þeir þurfi að skera niður fé vegna þessa.

Fulltrúar frá atvinnuvega- og nýsköpunarráðuneytinu, Bændasamtökunum, Ráðgjafarmiðstöð landbúnaðarins og Bjargráðarsjóði héldu sinn annann fund  í morgun til að fara yfir stöðu mála.

Á fundinum var meðal annars. farið yfir  stöðu mála hvað varðar hey- og fóðurbirgðir og jafnframt hvort nægjanlegt magn væri til af sáðvöru og áburði. Þá var auk þess rætt um aðkomu ríkis og sveitarfélaga að málinu.

Atvinnu- og nýsköpunarráðuneytið telur að eins og sakir standa sé erfitt að meta nákvæmlega umfang vandans þar sem að það ræðst meðal annars af veðurfari næstu vikna. Það þykir því rétt að búa sig undir það versta en vona um leið hið besta.