Sjá meinbugi á hugmynd um fríhöfn á hafnarbakkanum

Hafnarstjórn Faxaflóahafna hefur vísað til Reykjavíkurborgar hugmyndum um að koma upp tímabundinni smærri fríhafnarverslunum með íslenskan varning innan „tollfrjálsrar girðingar“ á hafnarsvæði borgarinnar.

Í tillögunni er meðal annars vísað til þess að nýta mætti kofa úr „jólaþorpum“ sveitarfélaga undir verslunina á þeim tíma sem skemmtiferðaskip venja hingað komur sínar.

Einar Þór Einarsson, hjá Icecard ehf., hefur leitað eftir viðræðum um málið hjá hafnaryfirvöldum víða um land. Erindi hans hefur þegar verið hafnað á Ísafirðiog á Akureyri. Svar hefur enn ekki borist frá Hafnarfirði.

„Eins og fram kemur í erindi Icecard ehf. er óskað eftir viðræðum um málið með nánari útfærslu í huga – og slíkt sjálfsagt ef áhugi er á að skoða málið af alvöru,“ segir í minnisblaði Gísla Gíslasonar, hafnarstjóra Faxaflóahafna, sem tekið var fyrir á síðasta fundi hafnarstjórnarinnar.

„En með þeim fyrirvara að hugmyndir bréfritara verði mun betur útfærðar auk þess sem skoða þarf áhrif hugmyndarinnar á aðra verslun í grenndinni og miðborginni sem ekki nýtur tollfríðinda annarra en samkvæmt reglum um virðisaukaskatt.“

Í umsögninni eru þó fundin á því ýmis tormerki að heimila tollfrjálsa verlsun innan girðingar. Þannig er sagt útilokað að nýta hafnarbakka innan svonefndrar ISPS-girðingar í því skyni, meðal annars vegna öryggismála og annarrar skipaumferðar en skemmtiferðaskipa.

Þá kalli afgirt smáhýsasvæði með fríhafnarleyfi við hlið núverandi þjónustumiðstöðvar á Skarfabakka á deiliskipulagsbreytingu. „Úthlutun slíkrar lóðar yrði eflaust að auglýsa.“

Einar Þór Einarsson segir hugmyndina hafa kviknað þegar hann fylgdist með ferðmönnum streyma úr skemmtiferðaskipum í Hafnarfirði. „Menn horfa bara á fólkið fara upp í rútur og hverfa,“ segir hann. Víða erlendis þekkist verslun sem þessi á hafnarsvæðum.

Hann segir hugmyndina náttúralega ekki fullmótaða, en fagnar því ef borgin og Faxaflóahafnir eru reiðubúin til frekari viðræðna um útfærsluna.

Ísafjarðarbær neitaði með vísan til Evrópureglna um starfsemi á hafnarsvæðum og Einar segir að Akureyri hafi vísað til þess að of lítið pláss væri fyrir starfsemina á hafnarsvæðinu þar.

„En þar var mér bent á ýmis önnur pláss utan girðingar, en maður var svo sem ekki beint að leita eftir því.“