Enginn tími til þess að vera skelkaður

Bensíntankurinn sem Ómar Ragnarsson skipti yfir á, rétt áður en hann brotlenti lítilli Cessna-flugvél við Sultartangalón í gær, innihélt eldsneyti til meira en tveggja og hálfrar klukkustunda flugs. Þetta segir Ómar í samtali við Vísi.

„Það er hugsanlegt að bensínið á vinstri tanknum hafi klárast, sem sýndi reyndar að það væri ekki búið, en hægri tankurinn var nánast fullur.“

Flugvélin endaði á hvolfi við lendinguna og skemmdist töluvert og segir Ómar að sér þyki það sérstaklega leiðinlegt, þar sem hann sé sjálfur ekki eigandi vélarinnar.

„Ég er leiðastur yfir því að flugvélin hafi farið svona illa, eins og þetta var glæsilega góð flugvél. Það er svo leiðinlegt að vera á flugvél frá öðrum þegar svona kemur fyrir, óskaplega leiðinlegt. Ég hef flogið þessari vél í mörg ár, yfir áratug.“

Ómar segist ekki hafa verið skelkaður, enda hafi hlutirnir gerst ansi hratt.

„Það var bara enginn tími til þess að vera skelkaður. Maður hefur bara mínútu til að leysa ákveðið verkefni. Maður verður að nýta þetta tímahrak.“

Ekki er vitað hvað olli biluninni en flugvélin er í rannsókn.

„Það fyrsta sem þeir sjá er að það var yfirdrifið nóg bensín á vélinni. Svo kemur annað, hvað gæti hafa valdið því að það drapst á mótornum og af hverju fór hann ekki í gang aftur? Það er ennþá furðulegra að hann skyldi ekki fara í gang aftur. Það er voða erfitt að úrskurða um það. Það getur verið stífla, það getur verið eitthvað að rafkerfinu, eiginlega hvað sem er. Þetta er það margt sem getur komið fyrir.“

Að sögn Ómars hefur ekkert komið fyrir hann í líkingu við þetta í 26 ár. Hann segist þó ekki vita hvort eitthvað sé til í þeim sögusögnum um að hann hafi níu líf.

„Ég er afskaplega þakklátur fyrir að ekki fór verr, þó ég viti nú ekki hvað lífin eru mörg.“