Utanríkisráðherra vill vita hvort Bandaríkjamenn hafi njósnað um Íslendinga

Gunnar Bragi Sveinsson utanríkisráðherra sagði á Alþingi í dag að ef Bandaríkin eða önnur ríki stunduðu njósnir í bandalagsríkjum sínum í Evrópu væri barnalegt að ætla að Ísland væri þar undanskilið. En íslensk stjórnvöld hefðu krafði Bandaríkjamenn svara um það hvort þeir hefðu stundað njósnir á Íslandi.

Árni Þór Sigurðsson þingmaður Vinstri grænna spurði ráðherrann út í þessi mál í ljósi þess að upplýsingar bentu til að Bandaríkjamenn hefðu m.a. njósnað um skrifstofur Evrópusambandsins.

Gunnar Bragi sagði alvarlegt ef svo væri. Hann hefði nú þegar óskað eftir svörum við þessu við sendiráð Bandaríkjanna hér á landi og sömuleiðis hefði sendiráð Íslands í Washington komið fyrirspurnum á framfæri.

„Það er alvarlegt ef satt reynist að stjórnvöld njósni um sína helstu bandamenn, og eðlilegt að kalla á skýringar og það verði upplýst hvort það hafi átt sér stað,“ sagði utanríkisráðherrann.

Það ætti hins vegar ekki að koma mönnum á óvart að öflugustu ríki heims stunduðu njósnir.

„Við megum ekki vera svo barnaleg að halda að við séum undanskilin þar,“ sagði utanríkisráðherra.