Flestir strikuðu yfir Bjarna

Bjarni Benediktsson var strikaður út, eða færður neðar á lista, af 738 kjósendum flokksins í Suðvesturkjördæmi, eða tæplega 5 prósent kjósenda flokksins.

Hann er því sá frambjóðandi sem er oftast strikaður út eða færður neðar á lista samkvæmt tölum Landskjörstjórnar. Á eftir Bjarna kemur samflokksmaður hans, Guðlaugur Þór Þórðarson, frambjóðandi flokksins í Reykjavíkurkjördæmi Suður, en 564 strikuðu nafn hans af kjörseðlinum eða breyttu röð hans á lista. Um sex prósent kjósenda flokksins í kjördæminu strikuðu hann því út.

Elín Hirst, einnig frambjóðandi Sjálfstæðisflokksins, var svo strikuð út af 551 kjósanda flokksins. Hún bauð fram í sama kjördæmi og Bjarni, eða Suðvesturkjördæmi.

Í Vinstri grænum var Álheiður Ingadóttir, frambjóðandi flokksins í Reykjavíkurkjördæmi Suður oftast strikuð út. 242 kjósendur flokksins strikuðu yfir nafn hennar eða breyttu röð hennar á listanum. Það eru tæplega 6 prósent kjósenda flokksins.

Í Framsóknarflokknum var Vigdís Hauksdóttir oftast strikuð út. 229 kjósendur strikuðu hana út eða færðu hana neðar á lista, sem gera um fjögur prósent kjósenda flokksins í kjördæminu.

Af Pírötum var Jón Þór Ólafsson, kapteinn Pírata í Reykjavíkurkjördæmi Suðri, oftast strikaður út. Alls strikuðu 85 kjósendur flokksins yfir hann eða breyttu röð hans á lista. Það eru um 4 prósent kjósenda listans.

Af Samfylkingarmönnum var oftast strikað yfir Össur Skarphéðinsson í Reykjavíkurkjördæmi Norður. Alls strikuðu 108 yfir hann eða rétt rúm tvö prósent kjósenda flokksins í kjördæminu. Raunar strikuðu fleiri hlutfallslega yfir Björgvin G. Sigurðsson, frambjóðanda flokksins í Suðurkjördæmi, eða rétt tæp 3 prósent. Því strikuðu 78 yfir nafn Björgvins, sem náði ekki endurkjöri á þing.

Freyja Haraldsdóttir, frambjóðandi Bjartrar Framtíðar í Suðvesturkjördæmi, var svo strikuð út af 152 kjósendum flokksins, og er því sá frambjóðandi flokksins sem var oftast strikaður út. Rúmlega þrjú prósent strikuðu yfir nafn Freyju eða breyttu röð hennar á lista.

Það munar þó aðeins 0,9 prósentustigum á Freyju og Björt Ólafsdóttur, frambjóðanda flokksins í Reykjavíkurkjördæmi norðri. Alls var strikað 119 sinnum yfir Björt, sem er 3,33 prósent útstrikana, á meðan Freyja var með 3,24 prósent. Hlutfallslega var því oftast strikað yfir Björt.

Engar útstrikanir höfðu áhrif á stöðu frambjóðanda á listum í kosningununum sem fram fóru 27. apríl síðastliðinn.