Fyrirtæki í eigu Disney stal íshrúti

Þorsteini Úlfari Björnssyni, kvikmyndagerðarmanni og áhugaljósmyndara, brá heldur betur í brún á dögunum þegar furðuvera í líki ísbjarnar með hrútshöfuð, sem hann sjálfur hafði búið til og sett saman með aðstoð myndvinnsluforritsins Photoshop, birtist í tölvuleik sem hann var að spila.

Tölvuleikurinn heitir Gardens of Time og er frá fyrirtæki sem heitir Playdom og er í eigu Disney. Þorsteinn setti myndina af furðuverunni inn á ljósmyndavefinn Flickr.com í júlí 2008 undir yfirskriftinni „Polar Sheep?“. Íshrútinn hannaði hann upphaflega fyrir auglýsingu.

Á spjallborði á vefnum ljósmyndakeppni.is lýsir Þorsteinn því hvernig hann sá íshrútinn fyrir einskæra tilviljun þar sem hann sat og spilaði tölvuleikinn. „Þegar ég var búinn að spila þennan leik og kominn í 10. borð missti ég andlitið. Þar var helvísk ísrollan kominn sem hluti af leiknum og meira að segja kölluð sama nafni og á Flickrinu mínu eða Polar Sheep? Það þarf náttúrlega ekki að taka það fram að Disney og/eða Playdom höfðu ekki samband við mig varðandi notkun, sem hefði verið auðvelt fyrir þá þar sem netfangið mitt kemur fram á Flickrinu.“

Þorsteinn Úlfar hafði samband við lögmann og var í kjölfarið boðinn samningur frá Disney þar sem farið var fram á að hann afsalaði sér öllum rétti til myndarinnar. Á spjallinu segir Þorsteinn að Disney hafi boðist til að borga honum 1.300 dollara, eða um 150.000 krónur, fyrir að ljúka málinu í góðu.

Samkvæmt heimildum hefur Þorsteinn skrifað undir samning við Disney en í honum er jafnframt ákvæði um að hann tali ekki um samninginn eða málið opinberlega. Þorsteinn tjáði sig hins vegar á spjallþræðinum áður en hann skrifaði undir samninginn og var þá ekki mjög hrifinn. „Svo á ég að halda kjafti og ekki ræða þetta við nokkurn mann. Þá ætla þeir að senda lögfræðinga á mig. Aukinheldur sem ég á að láta frá mér allan rétt til að sækja þá til saka ef þeir brjóta samkomulagið,“ skrifaði hann þar.

Eins segist hann þar ósáttur við upphæðina sem þeir buðu honum eftir að hafa stolið myndinni. „Hefði verið sáttur með 1.300 dollara ef þeir hefðu spurt um leyfi. Jafnvel minna. En þeir stálu myndinni og það er ég ósáttur við.“