Karl hannar kertalínu

Þýski hönnuðurinn Karl Lagerfeld hefur samið við fyrirtækið Welton London um framleiðslu á kertalínu í sínu nafni. Kertin verða fáanleg víða um Evrópu, Ameríku og í Miðausturlöndum en hinn 79 ára gamli Lagerfeld er yfirhönnuður hjá Chanel.

Hann er þekktur fyrir heldur sérkennilega hegðun en nýverið sagði hann frá því að hann væri ástfanginn af kettinum sínum, Choupette.

Þrátt fyrir háan aldur hefur hönnuðurinn ekki í hyggju á að hætta. „Af hverju ætti ég að hægja á mér? Það er glatað! Ég lifi heilbrigðu líferni. Ég reyki ekki, borða ekki of mikið, drekk ekki og tek engin eiturlyf. Hausinn á mér er rétt skrúfaður á og ég þarf alls ekkert að slaka á.“