Vill leggja íþróttadeild RÚV niður

Brynjar Níelsson alþingismaður hefur undanfarna daga lýst yfir þeirri skoðun sinni, við ýmis tækifæri, að endurskilgreina þurfi stöðu Ríkisútvarpsins á markaði. Hann telur stofnunina ekki þjóna neinu hlutverki í nútímanum, þar sem aðgengi að upplýsingum og menningu er ótakmarkað með netinu. Brynjar telur varðstöðu um RÚV ohf byggja á vana því engin rök hafi hann fengið fyrir því hvers vegna stofnunin eigi að vera við lýði í nútíma samfélagi.

"Stjórnvöld gera í sjálfu sér ekkert nema vilji sé til þess. Ég er að reyna að efla þessa umræðu. En, auðvitað munar meðalfjölskyldu um 80 þúsund krónur á ári."

Brynjar segir stofnuna ekki eiga að vera heilaga. Um þetta verði vitaskuld að vera sátt. Ef menn vilji sturta fé í þetta þá verði svo að vera. En, Brynjar segir rökin sem menn höfðu fyrir tilvist Ríkisútvarps í gamla daga, þau að stofnunin þjóni öryggis- og menningarhlutverki, séu lúin - þær forsendur hafa gerbreyst með nýrri upplýsingatækni og upplýsingamiðlun.

Brynjar sér fyrir sér millileik sem gæti falist í því að starfsemin verði endurskilgreind og skorin niður, þá við rekstur fréttastofu og að halda megi Rás eitt. Þetta gæti kostað einn milljarð en ekki vel á fjórða milljarð eins og raunin er nú. Sem eru miklir peningar fyrir 320 þúsund manna þjóð.

"RÚV hefur til dæmis ekkert með íþróttadeild að gera," segir Brynjar: Íþróttadeildin er kristaltært dæmi um að RÚV sem stofnun sé komin langt út fyrir skilgreint hlutverk sitt.