Vill vopnaleitarhlið í þinghúsið

Nauðsynlegt er að koma upp vopnaleitarhliði í Alþingishúsinu segir þingmaður Framsóknarflokksins eftir atburð fyrir jól þar sem maður reyndi að skaða sig með hnífi á salerni þinghússins. Þá vill þingmaðurinn að öryggismál þingsins verðir í höndum Ríkislögreglustjóra.

Vigdís Hauksdóttir, þingmaður Framsóknarflokksins, segir að atburður sem átti sér stað fyrir jól í Alþingishúsinu sitji mjög í sér. Karlmaður sem hafði verið að fylgjast með umræðum uppi á þingpöllum fór inn á salerni og reyndi að skaða sig með hnífi. Lögregla brást skjótt við og kom manninum til bjargar.

„Ég er mjög hugsi yfir þessum öryggismálum þegar maður vopnaður hnífi kemst alla leið inn í þingsalinn má segja. Ég hef nú oft hugsað að hægt hefði verið að gera þarna mikinn skaða ef þetta hefði verið annars konar vopn en hnífur," segir Vigdís.

„Ég tel að öryggismál þingsins eigi að vera á höndum ríkislögreglustjóra og að Alþingi verði flokkað til æðstu stjórnar ríkisins," segir Vigdís. Hún segir að þingmenn hafi orðið mjög skelkaðir vegna hnífamálsins og óhugur sé í þeim eftir atburðinn.

„Ég upplifi mig ekkert óörugga á þinginu, alls ekki. En við verðum að koma þessum málum í lag og efla fjármagn til lögreglunnar svo hægt sé að halda hér uppi lögum og reglu. Líka vegna þess að gagnrýnin er svo mikil í samfélaginu um að allt sem hafi miður farið sé alþingismönnum að kenna, þá er svo auðvelt að mynda múgæsing sem snýr að þingmönnum," segir Vigdís.

Vigdís segir að það eigi að vera forgangsmál hjá Alþingi að koma upp vopnaleitarhliði sem allir ganga í gegnum sem fara inn í þinghúsið. „Ég tel að það sé næsta skref hjá okkur, já," segir hún.