Gríðarleg sprengja í tilkynningum um kynferðisbrot

Yfirmaður kynferðisbrotadeildar lögreglunnar á höfuðborgarsvæðinu segir að gríðarleg sprenging hafi orðið síðustu vikur í tilkynningum fólks um kynferðisbrot. Hann segir brotin verða grófari með hverju árinu og minnir á að lögreglan rannsaki öll mál, óháð því hvort þau séu fyrnd.

Björgvin Björgvinsson yfirmaður deildarinnar var gestur í Bítinu á Bylgjunni í morgun. Hann sagði að síðustu ár hafi dómum í kynferðisbrotamálum fjölgað og sama sé að segja um kærur. Að sögn Björgvins varð síðan gríðarleg sprenging í kærum eftir að Kastljósið greindi frá brotum Karls Vignis Þorsteinssonar.

„Svona sem dæmi tókum við á móti tæplega fimmtíu kærum um kynferðisbrot og það hefur aldrei gerst í sögu kynferðisrbrotadeildar, þannig að það hefur verið mjög mikið álag."

Ellefu manns starfa við kynferðisbrotadeildina en deildin sinnir einnig öðrum málum líkt og stórfelldum líkamsárásum og heimilisofbeldi.

„Þannig að þetta er mikið álag en við reynum bara að forgangsraða þessu en erum þó í þeirri von að fá að minnsta kosti einhverja fjölgun en það er óljóst hvort að af því verðu."

Björgvin bendir einnig á að öll mál sem kærð eru til lögreglu séu rannsökuð óháð því hvort þau séu fyrnd.

Björgvin segir það vera sína tilfinningu að kynferðisbrot hafi orðið grófari síðustu ár.

„Ég held nú til dæmis að mikið aðgengi að klámi og þvíumlíku ýti undir óeðli og einhverja gervimennsku þannig að manneskjan sem verið er að brjóta á sé ekki lengur manneskja heldur einhverskonar kynlífsviðfang," segir hann.