Ummælin dæma sig sjálf

„Þetta snýst ekki um að við séum að fela eitthvað. Við viljum bara að rétt verð komi fram. Þeir hafa ekki í einu né neinu sinnt athugasemdum sem við höfum gert. Það gildir væntanlega um aðra aðila," segir Bjarni Friðrik Jóhannesson rekstrarstjóri Nóatúns.

Fjallað hefur verið um þá ákvörðun forsvarsmanna Hagkaups að draga fyrirtækið út úr verðlagskönnunum ASÍ og bætast þar með í hóp þriggja verslana sem þegar höfðu lokað á verðlagskönnun í verslunum sínum.

„Kostur, Víðir og Nóatún ásamt Hagkaupum hafa formlega vísað okkur út úr sínum verslunum en aðrar verslanir hafa ekki gert það," sagði Henný Hinz, hagfræðingur hjá ASÍ, í útvarpsfréttum Bylgjunnar í dag. Þó er ljóst að fleiri verslanir hafa kosið að standa utan verðkannana ASÍ. Samkaup Úrval kaus að standa utan kannana ASÍ í nóvember en verslun fyrirtækisins á Akureyri var þó með í verðkönnuninni í desember.

Bjarni Friðrik segir fulltrúa Kosts og Víðis hafa riðið á vaðið á sínum tíma.

„Eftir því sem aðilum á markaðnum sem kusu að draga sig út úr þessum mælingum fjölgaði þá voru meira og minna lágvöruverslanir sem voru eftir standandi fyrir utan Nóatún og Hagkaup. Þar er ekki lagt að jöfnu það þjónustustig sem veitt er í þessum verslunum og svo það sem er í gangi á hinum stöðunum," segir Bjarni Friðrik.

Hann bendir á að forsvarsmenn Hagkaups og Nóatúns hafi í lengri tíma gert alvarlegar athugasemdir við það verklag sem viðhaft sé í verðlagskönnunum.

„Það er eitt að hafa uppi verðlagseftirlit en það er grundvallaratriði að þær niðurstöður sem birtar eru séu réttar," segir Bjarni Friðrik. Hann bendir á að gagnrýnin snúi fyrst og fremst að því að gæði mælinga ASÍ séu ekki nándar nærri góð.

„Við höfum ítrekað bent á villur í þeim niðurstöðum sem hafa verið birtar og gert athugasemdir við þær villur sem snúið hafa að okkur. ASÍ hefur að engu leyti sinnt þeim athugasemdum," segir Bjarni Friðrik.

Forsvarsmenn ASÍ hafa látið hafa eftir sér í dag að verslanirnar fjórar gætu haft eitthvað að fela. Þá segir á heimasíðu ASÍ að ástæða sé til þess að vara neytendur við að versla í þessum verslunum. Ætla megi að þær leiti skjóls til verðhækkana í því að útiloka fulltrúa neytenda úr verslunum sínum og gera þeim ókleift að sinna sjálfsögðu aðhalds- og upplýsingahlutverki sínu.

„Ég held að slík ummæli dæmi sig bara sjálf. Það er háalvarlegt mál ef ASÍ ætlar ekki að gangast við þeim misferlum eða villum í þessum verðkönnunum sem við höfum ítrekað bent á," segir Bjarni Friðrik. Þeir hafi ekkert að fela.

Hann nefnir handahófskennt dæmi um aðferðir sem viðhafðar séu í viðhorfskönnunum ASÍ.

„Sem dæmi má nefna epli af tegundinni Jonagold. Þá er tekið verð af slíku epli hjá okkur en allt öðrum tegundum epla hjá samkeppnisaðilanum," segir Bjarni Friðrik.