Minnst 10 brot áhugaljósmyndarans til rannsóknar

Minnst tíu mál eru til rannsóknar vegna karlmanns sem grunaður er um að hafa brotið gegn stúlkum, flestum undir lögaldri, með því að fá þær til að afklæðast undir því yfirskini að hann væri ljósmyndari. Brotin áttu sér stað á árunum 2010 og 2011. Hæstiréttur staðfesti í dag gæsluvarðhaldsúrskurð yfir manninum. Í gæsluvarðhaldskröfu kemur fram að ríkissaksóknari hafi upplýst að ákæra yrði gefin út á hendur manninum, en mál hans eru enn til skoðunar hjá embættinu.

Í flestum þessara mála er maðurinn grunaður um að hafa verið í tölvusamskiptum við stúlkur á aldrinum 12 til 15 ára og leitast þar við að fá þær í nektarmyndatökur eða taka þátt í myndatöku, sem sýni kynferðislegar athafnir karls og konu, hvatt þær til að afklæðast fyrir framan vefmyndavél og haft sjálfur uppi kynferðislega tilburði við þær bæði í tali og verki.

Þá kemur líka fram að önnur ætluð kynferðisbrot kærða frá þessum árum séu til rannsóknar. Eftir að mál þessi komu til kasta ríkissaksóknara bárust lögreglu fjórar kærur út af málum þar sem rökstuddur grunur er um að kærði hafi sett sig í samband við stúlkur á aldrinum 13 til 16 ára til að fá þær í nektarmyndatöku gegn greiðslu. Til viðbótar við þessi mál hafa jafnframt borist tvær kærur þar sem kærði er sakaður um kynferðisbrot gegn tveimur unglingsstúlkum á árunum 2008 eða 2009, auk þess sem boðað hefur verið að fleiri kærur séu í farvatninu.

Samkvæmt úrskurði Hæstaréttar mun maðurinn sæta gæsluvarðhaldi til 1. mars.