Flestir treysta Sigmundi

Sigmundur Davíð Gunnlaugsson formaður Framsóknarflokksins er sá stjórnmálaleiðtogi sem menn treysta best til að leiða næstu ríkisstjórn.

Í könnun Stöðvar 2 og Fréttablaðsins sem gerð var í gær og í fyrradag spurðum við hverjum fólk treysti best til þess að leiða ríkisstjórn að loknum kosningum sem fram fara þann tuttugasta og sjöunda apríl. Árni Páll Árnason nýkjörinn formaður Samfylkingarinnar fær þrettán prósenta fylgi, Bjarni Benediktsson, formaður Sjálfstæðismanna mælist með nítján prósent, Guðmundur Steingrímsson Bjartri framtíð fær sjö prósent og Katrín Jakobsdóttir formaður Vinstrihreyfingarinnar græns Framboðs nýtur trausts fimmtán prósenta aðspurða.

Það er hinsvegar formaður Framsóknarflokksins, Sigmundur Davíð Gunnlaugsson sem nýtur mests stuðnings, en tuttugu og átta prósent þeirra sem afstöðu tóku. Hann er enn sterkari á landsbyggðini þar sem 40 prósent aðspurðra treysta honum best. Nokkrir aðrir stjórnmálamenn fengu síðan samtals átján prósent en flestir eru þó óákveðnir í þessum efnum, eða rúmur helmingur.

Stefanía Óskarsdóttir stjórnmálafræðingur bendir á að ferill Sigmundar á formannsstóli sé athyglisverður. Hann hafi tekið við erfiðu búi og verið reynslulítill í pólitík.

Sp. blm. En svo verða einskonar vatnaskil með Icesave, fyrir Sigmund og flokkinn?

„Já, nákvæmlega. Sigmundur hefur verið kröftugur í umræðunni um efnahagsmál, fólk er örvæntingarfullt og er að leita að þeim sem virðist hafa lausnirnar."

Og það er ekki bara að Sigmundur sé á flugi, flokkurinn hans hefur einnig sjaldan mælst hærri í könnunum. Könnun náði einnig til fylgi flokka eins og greint var frá í Fréttablaðinu í morgun. Bjartri framtíð fatast eilítið flugið í henni miðað við síðustu kannanir og mælist með 8,7 prósent. Framsóknarmenn undir forystu Sigmundar fengju hinsvegar 26,1 prósent ef þetta yrðu niðurstöður næstu kosninga. Sjálstæðisflokkurinn er enn sem fyrr stærsti flokkurinn en fylgið dalar þó þrátt fyrir nýafstaðinn landsfund og mælist hann með 29 prósent. Samfylkingin fengi 12,8 prósent og VG hækkar sig frá síðustu könnun og mælist með 11,8 prósent.

Sigmundur Davíð segir að könnunum eigi ávallt að taka með fyrirvara.

„En þetta er góð hvatning vegna þess að þetta gefur að minnsta kosti vísbendingu um að hægt sé að ná tölverðum árangri í næstu kosningum, nægum árangri til þess að það sé hægt að hafa áhrif eftir kosningarnar," segir Sigmundur.

Sigmundur er sammála Stefaníu um að Icesavedómurinn hafi breytt miklu fyrir flokkinn.