Áfengi mesti einstaki skaðvaldurinn

Fyrstu niðurstöður rannsókna á eitrunum sem komu til meðferðar á bráðamótttökunni í fyrra voru kynntar á Bráðadeginum á föstudag. Ellefu ár eru síðan síðasta viðlíka rannsókn var gerð.

Guðborg A. Guðjónsdóttir, sérfræðingur í eiturefnafræði við eiturefnamiðstöð Landspítalans, er ein þeirra sem vann að rannsókninni.

„Á þessum fyrstu tveimur mánuðum komu 172 eitranir til meðferða á bráðamótttöku. Þetta eru aðens fleiri konur en karlar og lang stærsti hlutinn eru lyfja- eða áfengiseitranir."

44 prósent eitrana þessa fyrstu tvo mánuði ársins 2012 voru vegna misnotkunar á áfengi eða lyfjum. Þetta er aukning frá síðustu rannsókn en fyrir áratug voru áfengis-oglyfjaeitranir 23 prósent. Þegar kemur að sjálfsvígstilraunum er um þær að ræða í 35 prósent eitrana í rannsókninni nú, en 40 prósent áður.

Athygli vekur að áfengi er sá skaðvaldur sem kemur oftast við sögu, eða í 41 prósentum eitrana.

„Algengast er að þetta séu blandaðar áfengis og lyfjaeitranir og það eru líka alvarlegustu eitranirnar."

Eitranir vegna óhappa eru aðeins 9 prósent sem er mikil breyting frá síðustu könnun þegar hlutfallið var 31 prósent.

„Síðan erum við líka með Eitrunarmiðstöð þar sem fólk getur hringt og fengið upplýsingar um hvað á að gera í eitrunartilfellum. Þangað fáum við um 1000 til 1500 símtöl á ári og meirihlutinn af þeim eitrunum eru óhappaeitranu. og það eru yfirleitt minniháttar eitranir vegna barna og þær koma ekki á bráðamótttökuna."

Engin dauðsföll urðu vegna eitrana þessa fyrstu tvö mánuði ársins 2012 en þegar litið er yfir árið í heild sinni voru þau nokkur, og að jafnaði eru dauðsföll vegna eitrana tæplega 30. Guðborg vonast til að niðurstöður fyrir allt árið verði hægt að kynna jafnvel í haust.