Tónlistarhátíð varð til á andvökunótt

„Hugmyndin fæddist á andvökunótt í nóvember. Ég lá andvaka og fékk skyndilega þá flugu í hausinn að skipuleggja tónlistarhátíð á Ólafsfirði sem ætti að heita Ólæti. Ég vakti Lilju, kærustu mína, sagði henni frá hugmyndinni og fór svo og skrifaði þetta allt niður,“ segir Sunna Björg Valsdóttir, nemandi við Menntaskólann í Tröllaskaga.

Hún skipuleggur tónlistar- og menningarhátíðina Ólæti sem fram fer á Ólafsfirði helgina 4. til 7. júlí ásamt Lilju Björk Jónsdóttur, Elísabetu Örnu Valsdóttur, Auði Ingólfsdóttur og Hafdísi Arnardóttur.

Sunna Björg, Lilja og Auður sátu námskeið hjá Evrópu unga fólksins í byrjun þessa árs og sóttu í kjölfarið um styrk hjá samtökunum. „Eftir námskeiðið vorum við komnar með fullmótaða hugmynd og styrkurinn gerði okkur svo kleift að fara af stað,“ segir Sunna Björg. Hún viðurkennir að það sé að mörgu að huga þegar skipuleggja á heila tónlistarhátíð.

„Ég hélt að þetta yrði ekkert mál þar sem hugmyndin var þegar komin, en það þarf að huga að mörgu og miklu fleira en mig hafði órað fyrir. Það þarf til dæmis að fá leyfi fyrir hinu og þessu, redda gæslu og auðvitað gistingu fyrir gesti og tónlistarfólk.“

Hátt í tuttugu hljómsveitir hafa staðfest komu sína á Ólæti og þeirra á meðal er raftónlistarmaðurinn Skurken og sveitirnar Vigri og Hide Your Kids. Sú síðastnefnda er frá Garðabæ og tók þátt í Músíktilraunum í ár. „Hugmyndin var sú að taka inn hljómsveitir sem eru enn að fóta sig og gefa þeim þannig tækifæri til að koma sér á framfæri. Við reynum svo líka að fá þekktari nöfn til að koma fram til að trekkja að.“

Að sögn Sunnu Bjargar hafa Ólafsfirðingar sýnt stúlkunum mikinn stuðning. „Við erum einmitt á fullu að kynna hátíðina fyrir bæjarbúum og hvetja þá til þátttöku,“ segir Sunna að lokum. Miðasala á hátíðina hefst á Midi.is og á völdum Olísstöðvum þann 1. maí næstkomandi.