Fréttablaðs-app komið í snjalltæki

Frá og með deginum í dag mun lesendum Fréttablaðsins standa til boða að fá blaðið sent í spjaldtölvu eða snjallsíma með nýju smáforriti, svokölluðu appi. Áfram verður hægt að nálgast vefútgáfu blaðsins hér á Vísi eins og verið hefur frá ársbyrjun 2005.

Nýja forritið er fáanlegt, án endurgjalds, í helstu smáforritaveitunum, App Store á tækjum frá Apple og Play Store á tækjum sem ganga á Android-stýrikerfinu.

Fréttablaðs-appið er byggt á forritinu Pressreader, sem miðlar fleiri en 2.300 fréttablöðum frá næstum 100 löndum. Það hefur hins vegar verið sniðið að Fréttablaðinu þar sem nú birtist sérstakt tákn á skjáborði notenda, sem hægt er að stilla með þeim hætti að það sæki nýjasta tölublaðið hvern útgáfudag.

Lesendur geta bæði flett einni blaðsíðu í einu, nánast eins og á hefðbundinn hátt, og eins rennt hraðar yfir blaðið með stiku á botni skjásins. Þá er bæði hægt að lesa efni blaðsins með því að þysja nánar inn á síður og með því að smella á einstakar fréttir.

Upplýsingar um appið er að finna á visir.is/fbl.