Bedi dæmdur í allt að níu ára fangelsi - Helga bíður dóms

Vicram Bedi var í dag dæmdur í allt að níu ára fangelsi fyrir að svíkja 20 milljónir dala, eða 2.5 milljarða, af bandarískum auðkýfingi ásamt Helgu Ingvarsdóttur, íslenskri unnustu sinni. Dómur yfir Helgu verður kveðinn upp þann 23. apríl næstkomandi. Þau höfðu bæði játað brot sín.

Bedi og Helga eru talin hafa svikið allt upp undir 20 milljónir dollara af Roger Davidson, þekktum djasspíanista og erfingja olíurisans Schlumberger Ltd, eins og fram kom í Fréttablaðinu og á Vísi í nóvember 2010. Þau höfðu þá nýlega verið handtekin. Davidson hefur hlotið Grammy-verðlaun fyrir rómanska tónlist. Bæði hafa þau neitað sök í málinu.

Málavextir eru allir með nokkrum ólíkindum. Davidson leitaði árið 2004 til tölvufyrirtækisins Datalink, sem parið rak, vegna tölvuvíruss. Parið laug í kjölfarið að honum að vírusinn ætti upptök sín á hörðum diski í þorpi í Hondúras og að frændi Bedis, indverskur hermaður, hefði farið í þorpið til að eyðileggja diskinn. Þar hafi frændinn hitt fyrir pólska presta með tengsl inn í trúarregluna Opus Dei, sem hafi viljað vinna Davidson mein og ræna völdum í Bandaríkjunum.

Þessu virðist Davidson hafa trúað og til að verja diskinn, sem á var öll hans tónlist, og líf sitt lagði hann til Datalink stórfé í mjög langan tíma.

Davidson og parið áttu í kjölfarið náin samskipti. Málið komst hins vegar upp eftir að viðskiptafélagar þremenninganna kærðu Davidson til lögreglu fyrir að njósna um þá með því að koma GPS-tækjum fyrir á bílum þeirra.