Slæm hugmynd að breyta lífeyriskerfinu

„Ég held að það sé ekki góð hugmynd," segir forseti ASÍ um hugmyndir um að lífeyrir ætti að fara í gegnum almannatryggingakerfið í stað núverandi kerfis.

Gylfi Þór Arnbjörnsson, forseti ASÍ, sagði í samtali við Reykjavík Síðdegis í dag að nýjar kynslóðir manna hér á landi væru fámennari en þær sem eru að eldast.

„Það er ekki fyrr en nú á allra seinustu árum að það eru jafnfjölmennar kynslóðir að fæðast á Íslandi," segir Gylfi. Hann bendir á að hans kynslóð fari á eftirlaun í kringum árið 2025. Langt sé í að þær kynslóðir sem nú eru að fæðast taki við byrðinni.

„Í dag er það um það bil þannig að það eru sex einstaklingar á vinnumarkaði fyrir hvern lífeyrisþega sem er á eftirlaunum. Árið 2030 mun þetta hlutfall vera þannig að aðeins þrír á vinnumarkaði verða fyrir hvern lífeyrisþega," segir Gylfi.

„Það gefur auga leið að við getum ekki skattpínt þá einstaklinga sem verða á vinnumarkaði árið 2030 til þess að standa undir þeim lífeyri. Það sáu forverar mínir og okkar í kringum 1970 og fóru þar af leiðandi að búa til kerfi sem byggir á því að hver kynslóð sé sjálfbær til sinna eftirlauna og líka vegna sinnar þjónustu."

Hægt er að hlusta á viðtalið við Gylfa í heild sinni í spilaranum hér fyrir ofan.