Júlíus einn á sjó

Slæmt veður á Vestfjarðamiðum undanfarna daga hefur gert það að verkum að nánast öll skip á svæðinu liggja við bryggju.

„Það er enginn á sjó í dag nema Júlíus Geirmundsson ÍS. Það er ekkert að gerast og menn bíða bara betra veðurs," segir Guðmundur M. Kristjánsson hafnarstjóri Ísafjarðarhafna í samtali við Bæjarins Bestu.

Aðeins er vitað til þess að skipverjar á aflaskipinu Júlíusi Geirmundssyni séu á miðunum út af Norðurlandi. Aðrir eru í landi.

„Það er mjög sjaldgæft að Júlíus komi í land í vondu veðri. Ísbjörnin, Ísborgin, Páll Pálsson, Stefnir, Gunnbjörn og allir smábátar eru hinsvegar í landi," segir Guðmundur í samtali við BB.is. Hann reiknar ekki með því að fleiri skip haldi út á miðin fyrr en í lok vikunnar.