Baldur Sigurðsson: Skipti um skó í hálfleik

Baldur Sigurðsson skoraði eitt marka KR í 3-1 sigri á Val á KR-vellinum í kvöld en með þessum sigri náðu KR-ingar fjögurra stiga forskoti á toppi Pepsi-deildar karla í fótbolta.

„Ég fékk þessa spurningu í dag og þetta er fáránleg spurning. Það er rétt að við erum með fjögurra stiga forystu og það er góð staða, en að segja að við séum með níu fingur á titlinum er kjánalegt því annað eins hefur nú gerst að menn klúðri svona stöðu. Ef að menn fá það inn í hausinn á sér og þið farið að prenta þetta inn í hausinn á ykkur þá verðum við fljótir að tapa þessu. Það er nóg eftir af tímabilinu,“ sagði Baldur Sigurðsson, leikmaður KR, spurður að því hvort að KR væri komið með níu fingur á titilinn eftir sigur á Valsmönnum í kvöld.

„Titillinn er engu að síður okkar til að tapa en það er mikið eftir af þessu og við þurfum að koma jafneinbeittir í næsta leik eins og við höfum verið að gera í síðustu leikjum. Þjálfarteymið gerði vel í því að koma okkur niður á jörðina eftir síðasta leik gegn FH og við vorum virkilega gíraðir í dag í það að vinna Valsarana loksins á heimavelli.“

„Frammistaða liðsins var mjög góð alveg frá markmanni og upp á topp. Það var reyndar óþolandi að fá á sig þetta mark og ég held að í síðustu fjórum leikjum hefur það gerst að við erum komnir í 2-0 og fáum á okkur mark sem setur óþarfa spennu í þetta. En við erum með gæði á öllum vellinum og þar á meðal frammi til að refsa liðunum og komast í 3-1 og klára leikinn alveg.“

„Maður fær aukaslag þegar þeir minnka muninn en við erum með góða vörn og mér fannst Grétar nú eiga alla háu boltana sem þeir voru að dæla fram,“ aðspurður hvort hann hafi orðið stressaður þegar Valur minnkar muninn. Baldur skoraði eitt mark í dag en var alltaf mættur í inn í teig og var ógnandi.

„Það var fúlt að skora ekki annað. Ég fékk ágætis færi í fyrri hálfleik en ég skipti um skó í hálfleik og bætti upp fyrir það þar,“ sagði markaskorarinn kampakátur að lokum.