Vilja ekki heimila afsal á flugvallarlandi til borgar

Stjórnarmeirihlutinn í fjárlaganefnd Alþingis hafnar því að bæta inn í fjárlagafrumvarpið heimild til að afsala borginni hluta Reykjavíkurflugvallar þar sem ekki er talinn meirihluti fyrir málinu í þinginu. Með þessu kemur Alþingi í veg fyrir að minnstu flugbrautinni verði lokað á næsta ári og landið tekið undir íbúðabyggð.

Borgaryfirvöld eru þegar komin vel á veg með að skipuleggja nýtt íbúðahverfi á svæðinu umdeilda sem þau kalla nýja Skerjafjörð en þar er gert ráð fyrir 600-800 íbúðum í fjögurra hæða blokkum. Byggt er á samkomulagi sem Dagur B. Eggertsson, formaður borgarráðs, og Katrín Júlíusdóttir, þáverandi fjármálaráðherra, gerðu skömmu fyrir síðustu þingkosningar um að ríkið selji borginni umrætt land.

Til að selja land í eigu ríkisins þarf samþykki Alþingis og í gildandi fjárlögum er fjármálaráðherra heimilað „að ganga til samninga við Reykjavíkurborg um sölu á hluta eða öllu af því landi ríkisins við Reykjavíkurflugvöll sem er fyrir utan flugvallargirðingu". Samkomulagið miðar við að Isavia færi girðinguna.

Þessi heimild rennur hins vegar út núna um áramótin og, - vegna mistaka í fjármálaráðuneyti, - gleymdist að setja inn í fjárlagafrumvarpið í haust endurnýjaða heimild fyrir næsta ár. Samkvæmt heimildum Stöðvar 2 lögðu embættismenn í fjármálaráðuneytinu nýlega til við fjárlaganefnd að þetta yrði lagfært með því að bæta eftirfarandi heimild inn: Að afsala Reykjavíkurborg hluta eða öllu af því landi ríkisins við Reykjavíkurflugvöll sem er fyrir utan flugvallargirðingu.

Stjórnarmeirihlutinn í fjárlaganefnd hafnaði hins vegar þessari tillögu, og sagði einn nefndarmanna að þar hefði ráðið það mat að ekki væri meirihlutastuðningur á Alþingi fyrir því að selja land flugvallarins.

Áform innanríkisráðherra, um að loka litlu flugbrautinni á næsta ári, virðast því ekki ætla að ná fram að ganga. Sú stefna forsætisráðherra, að ekki verði hróflað við landi flugvallarins, virðist ætla að verða ofan á.