Vill nýtt mat fyrir breytt vegstæði um Teigsskóg

Vegagerðin hyggst hefja enn eina tilraun til að koma vegi um Teigsskóg á Vestfjörðum í gegnum umhverfismat.  Hanna Birna Kristjánsdóttir innanríkisráðherra kvaðst á Alþingi vera bjartsýn um að það tækist.

Það var með fyrstu verkum nýs ráðherra vegamála síðastliðið sumar að funda með Vestfirðingum um Teigsskóg og skoða hið umdeilda vegstæði í fylgd vegamálastjóra. Um leið fól Hanna Birna Vegagerðinni að reyna aftur að koma veginum í gegnum umhverfismat.

Um mitt sumar hafnaði Skipulagsstofnun hins vegar drögum að nýrri matsáætlun, með þeim rökum að vegurinn væri búinn að fara í gegnum umhverfismat og verið hafnað.

Vegagerðin gefst ekki upp og hyggst fyrir jól leggja fyrir Skipulagsstofnun enn nýja matsáætlun um breytta veglínu um skóginn og hefur stuðning ráðherra, en málið kom til umræðu á Alþingi í vikunni.

„Mín afstaða hefur verið alveg ljós. Ég tel að það eigi að leggja vegstæðið með þeim hætti sem Vegagerðin hefur lagt til og hefur verið fyrsti kostur íbúa á svæðinu,“ sagði Hanna Birna.

„Ég hefði talið að það væri farsælast, það væri öruggasta leiðin og ég tel einnig að það hafi verið komið mjög til móts við umhverfissjónarmið þar og vegurinn hafi verið lagfærður þannig að hann vinni betur með nágrenninu og umhverfinu á svæðinu. Mín von er ennþá sú að það takist og ég vona að við fáum svör við því sem allra fyrst,“ sagði ráðherrann á Alþingi.