Eigendur Fernöndu koma til landsins á morgun

Starfsmenn Norfos Shipping, eiganda flutningaskipsins Fernöndu sem nú liggur stórskemmt í höfn á Grundartanga, koma hingað til lands núna um helgina. Með í för verða fulltrúar tryggingafélaga sem munu meta skemmdirnar.

Fernanda var dregið til hafnar á Grundartanga um miðjan dag í gær. Slökkvilið Akraness sá um að tryggja svæðið með olíugirðingu og hafa í dag verið að störfum í lestum skipsins.

Reykkafarar frá slökkviliði höfuðborgarsvæðisins, sem börðust við eldinn á rúmsjó eftir að Fernanda var dreginn alelda úr Hafnarfjarðarhöfn síðastliðinn föstudag, hafa verið þeim til halds og trausts.Skoðun er nú lokið, eldurinn kulnaður og eftir stendur flak Fernöndu.

Nú tekur næsti kafli við.

Grundartangi tilheyrir Faxaflóahöfnum. Gísli Gísla, hafnarstjóri Faxaflóahafna, sagði í samtali við fréttastofu í dag að ákveðið hefði verið að leyfa Landhelgisgæslunni að draga Fernöndu í höfn, að því gefnu að skipið verði þar ekki lengi.Því er allt kapp lagt á að dæla þeim hundrað tonnum af olíu sem eftir eru í tönkum Fernöndu úr skipinu. Áður en það er gert þurfa tryggingafélög eistneska fyrirtækisins Norfos Shipping að meta skemmdir og ástand Fernöndu.

Ingvar Sigurðsson, forstöðumaður stórflutninga hjá Eimskip, hefur haft milligöngu um samskipti Norfos Shipping og íslenskra viðbragðsaðila. Ingvar segir að tryggingamat fari fram á tveimur forsendum, annars vegar umhverfisþáttum og hústryggingu og hinsvegar er það sjálfur skrokkur Fernöndu en eins og sjá má þessum myndum er hann stórskemmdur.Þetta tryggingamat mun fara fram um helgina og í næstu viku.

Eftir að það liggur fyrir verður hafist handa við að tæma olíuna úr flakinu en verkefnið heyrir undir Umhverfisstofnun. Fjölmargir hafa sýnt flaki Fernöndu áhuga enda eru veruleg verðmæti fólgin í brotajárninu.

Óvíst er hvar Fernanda verður rifin í brotajárn og svo gæti farið að verði gert í Danmörku.