Áhorfendum fjölgaði lítillega

1.057 áhorfendur að meðaltali mættu á leikina 132 í Pepsi-deild karla í knattspyrnu í sumar. Um er að ræða örlitla fjölgun frá því í fyrra þegar meðalaðsóknin var 1.034 áhorfendur.

KSÍ birtir áhorfendatölurnar á heimasíðu sinni. KR virðist hafa fjölmennastan hóp stuðningsmanna. 1.863 mættu á heimaleiki Íslandsmeistaranna en næst komu FH-ingar með 1.496 áhorfendur.

Helmingur liðanna í deildinni var með fleiri en 1000 áhorfendur að meðaltali á heimaleiki sína. Flestir mættu á útileiki hjá KR, 1.497 að meðaltali og næstflestir á útileiki hjá FH, 1.316.

Flestir áhorfendur voru á Þjóðhátíðarslag ÍBV og FH um Verslunarmannahelgina en 3.034 sáu leikinn. Fæstir áhorfendur voru einnig á Hásteinsvelli þegar ÍBV mætti Keflavík 22. ágúst. 383 sáu leikinn.

Flestir mættu á leiki í 1. umferð eða 8.960 áhorfendur á leikina sex. Fæstir mættu á leikina í 19. umferð eða 3.833.

Meðalaðsókn undanfarin ár:

2000 899

2001 1076

2002 996

2003 1025

2004 1026

2005 1070

2006 1089

2007 1329

2008 1106

2009 1029

2010 1205

2011 1122

2012 1034

2013 1057