Umfjöllun, viðtöl og einkunnir: Fram - FH 0-2

FH vann Fram 2-0 í Pepsí deild karla í fótbolta á Laugardalsvelli í dag. FH var 1-0 yfir eftir fjörugan fyrri hálfleik. Atli Viðar Björnsson skoraði bæði mörkin.

Fyrri hálfleikur var opinn og skemmtilegur. Bæði lið sóttu hratt og fengu fjölda færa fyrir utan það sem Atli Viðar skoraði úr.

FH byrjaði betur en Fram vann sig inn í leikinn en átti í vandræðum með að hitta markið úr fínum færum framan af leik. Það var ekki fyrr en í stöðunni 2-0 og Aron Bjarnason hafði komið inn á að Fram fór að hitta markið og þá fór Róbert Örn Óskarsson mikinn í marki FH.

Með 1-0 forystu náði FH stjórn á leiknum í upphafi seinni hálfleiks. Fram gekk lítið fram á við og FH náði að skora gott mark fyrir fyrirgjöf. Það var ekki fyrr en í þeirri stöðu að Fram fór að finna leiðir í gegnum vörn FH sem hafði verið firnasterk.

Áður nefndur Aron Bjarnason kom með mikinn kraft inn í leikinn fyrir Fram en liðið fann ekki leiðina framhjá Róberti Erni. FH fékk líka sín færi til að gera út um leikinn án þess að nýta þau.

Björn Daníel Sverrisson lék sinn síðasta leik fyrir FH, í bili að minnsta kosti því hann fékk sitt fjórða gula spjald í sumar og missir því af síðasta leik tímabilsins vegna leikbanns. Hann fékk þó heiðursskiptingu í lokin og var vel fagna af þeim fáu FH-ingum sem gerðu sér ferð í Laugardalinn.

Heimir: Urðum að klára Evrópusætið„Ég er fyrst og fremst ánæður með þennan sigur. Við vissum að KR myndi klára þetta og við yrðum að klára Evrópusætið og við gerðum það í dag,“ sagði Heimir Guðjónsson þjálfari FH.

„Þetta var vel gert hjá leikmönnum FH. Þetta var kaflaskipt. Við byrjuðum sterkt en þeir komust inn í leikinn. Við spiluðum vel á köflum. Héldum boltanum vel innan liðsins, héldum hreinu og skoruðum tvö mörk. Heilt yfir var þetta fín frammistaða.

„Þegar við féllum til baka, settum við ekki næga pressu á Framara þegar þeir komu inn á okkar vallarhelming en við náðum að laga það í seinni hálfleik og unnum okkur ágætlega inn í hann. Fram er erfitt lið. Þeir eru með fínt lið og marga góða leikmenn og eru sterkir í skyndisóknum. Það var sterkt að koma hingað og vinna leikinn.

„Við viljum að sjálfsögðu klára þetta mót með sæmd og klára þetta annað sæti. Til að það gerist þurfum við að vinna Stjörnuna í síðasta leiknum á heimavelli. Stjarnan er með þrusu gott lið. Það verður hörkuleikur og við þurfum að klára þetta með sæmd og sýna stoltið á okkar heimavelli.

„Það var orðið ljóst að KR myndi klára þetta og við þurftum að koma okkur inn í Evrópukeppnina. Allir sem standa að FH hafa séð að það er hægt að gera góða hluti í þessari Evrópukeppni ef menn vanda til verksins og þar viljum við vera á næstu árum,“ sagði Heimir að lokum.

Ríkharður: Þarft að nýta færin sem þú færð„Það er aldrei gaman að tapa fótboltaleikjum en að sama skapi er gott að þessari fallbaráttu sé lokið. Við höfum verið á grensunni að vera í fallbaráttu og hefðum getað lent í vondum málum fyrst leikurinn fór svona ef allt hefði farið á móti okkur. Það er gott að það gerðist ekki,“ sagði Ríkharður Daðason þjálfari Fram sem var nokkuð létt þrátt fyrir ósigurinn þar sem Víkingur tapaði fyrir Fylki og Fram því ekki lengur í fallhættu.

„FH byrjaði leikinn mun betur en við og voru miklu betri fyrstu 20 til 25 mínúturnar og skoruðu úr horni sem er súrt að fá á sig en þeir hafa svo sem skorað mikið úr föstum leikatriðum í sumar og verið góðir í því en við erum ekki ánægðir með að fá á okkur svoleiðis mark. Eftir það komumst við betur inn í leikinn og fórum að halda boltanum betur og fengum færi til að jafna en á móti góðu liði eins og FH þarftu að nýta færin sem þú færð og ef þú gerir það ekki koma þeir til baka og refsa og það gerðu þeir í seinni hálfleik.

„Aron (Bjarnason) hefur oft komið frískur inn á og gerði það aftur núna. Við fengum í gegnum leikinn eitthvað, við fengum nokkur skot sem fóru í varnarmenn á leiðinni sem litu betur út. Svo fær Aron tvær tilraunir og Hólmbert færi til að koma okkur inn í leikinn en á meðan við fáum aldrei þetta mark þá fjaraði þetta frá okkur og á endanum rúllaði þetta út.

„Deildarkeppnin er vonbrigði. Seinni umferðin er ekki nógu góð. Við byrjuðum hana mjög illa og spiluðum virkilega illa þar sem við áttum ekkert skilið úr þremur leikjum þar. Við komum betur upp um miðbikið en náum ekki nógu mörgum stigum. Við gerum jafntefli og töpum leikjum sem við áttum meira skilið úr.

„Bikarmeistaratitillinn reddar þessu fyrir okkur með það að við höfum eitthvað til að byggja á með Evrópukeppninni. Við þurfum að verða betri. Við getum ekki sætt okkur við rétt rúmlega 20 stig, það er allt of lítið. Við þurfum að vilja meira í hverjum einasta leik. Við gefum of mikið frá okkur með því að gefa einföld mörk í allt of mörgum leikjum. Við höfum einu sinni haldið hreinu í allt sumar sem er engan vegin nógu gott,“ sagði Ríkharður.