Lögleiðing fíkniefna eina vitið

Jón Steinar Gunnlaugsson, lögmaður og fyrrverandi hæstaréttardómari, telur sig greina viðhorfsbreytingu í þá átt að menn geri sér í auknara mæli grein fyrir því að eina leiðin til að takast á við fíkniefnavandann sé lögleiðing fíkniefna.

Jón Steinar telur Vesturlönd á kolvitlausu róli með að beita banni, refsingum og kröftum gegn fíkniefnum í stað þess að meðhöndla fíkniefnaneytendur sem sjúklinga. Og reyna að hjálpa þeim til að ráða bót á þeim vanda sem slíkri neyslu er samfara. Hann vill lögleiða fíkniefni, með það fyrir augum að styðja við bakið á fíkniefnaneytendum.

„Við bætum ekki þetta ástand með því að búa til neðanjarðarheim þar sem við nærum glæpamennsku við að stjórna þeim heimi, tökum hann burtu frá löggæslunni. Og dæmum svo börnin okkar út úr samfélaginu ef þau stíga feilspor í þessu og fara að neyta þessari fíkniefna. Þetta eru þau einföldu sannindi sem ég er að benda á.“

Jón Steinar hvetur menn til að vakna og átta sig á þessu! Hann hvetur Vesturlönd öll til að skoða vandann, breyta um aðferðarfræði og taka höndum saman. Þetta er ekki í fyrsta skipti sem Jón Steinar bendir á þetta og fyrst þegar hann kynnti þessar hugmyndir sínar varð uppi fótur og fit. Hugmyndir sem þessar hafa yfirleitt verið afgreiddar á þeim forsendum að þær séu hugmyndir dóphausa sem vilja greiðari aðgengi að vímuefnum. Jón Steinar telur sig marka viðhorfsbreytingu í þessum efnum.

„Ég held að æ fleiri hafi verið að átta sig á í hverskonar öngstræti við erum með þessa stefnu okkar í fíkniefnamálum. Og hef í vaxandi mæli séð kvikna á perunni hjá mönnum. Við verðum að hætta að meðhöndla þennan málaflokk á þennan hátt. Mætti ég minna á að þörfin fyrir vímu hefur fylgt mannkyni svo langt sem augað eygir aftur í tíman. Við búum til eitt vímuefni sem við höfum löglegt, af því að við viljum fara á barinn, fína fólkið, og bönnum hitt.“

Jón Steinar telur þetta augljósan tvískinnung.

Hér má sjá viðtal við Jón Steinar í Harmageddon þar sem hann talar um nauðsyn þess að hjálpa fólki sem ánetjast fíkniefnum í stað þess að dæma það úr samfélaginu.