Dreifði Snapchat-nektarmynd af unglingsstúlku

Lögreglunni á höfuðborgasvæðinu berast reglulega fyrirspurnir og ábendingar frá foreldrum og öðrum vegna eineltis á netinu. Í stöðuuppfærslu á Facebook-síðu ögreglunnar segir lögreglan að eitt af því hryggilegasta sem þau heyri af sé þegar börn, oftar en ekki unglingar, eru göbbuð til að taka af sér myndir sem síðan er dreift til annarra.

Þórir Ingvarsson, rannsóknarlögreglumaður segir að þessi mál séu ekki endilega að færast í aukana, en því sé þó erfitt að svara án þess að það sé kannað sérstaklega. Þetta sé því miður fylgifiskur internet-samskipta og aukinnar netnotkunar barna.

Hann segir að einelti hafi færst yfir á netið en það sé í sjálfu sér ekki nýtt, það sé þróun sem hafi verið síðasta áratuginn.

Vandamálið að hans sögn séu oft Facebook-hópar og tölvupóstar þar sem myndum af fólki er dreift. Myndum sem fólk, börn og unglingar hafa tekið af sjálfum sér og sent einhverjum einum, lendi í höndum mun fleiri manna.

Manaði stúlkuna til að senda mynd af sér

Móðir 13 ára stúlku sem sendi félaga sínum mynd af sér þar sem hún var ber að ofan, segir síðustu daga hafa verið erfiða á heimilinu, eftir að í ljós kom að strákurinn vistaði myndina og áframsendi hana til vinar síns.

Þaðan fór myndin, sem stúlkan sendi í gegnum appið Snapchat í hendur mun fleiri krakka. Móðir fékk símtal frá móður annars barns í skólanum sem sagði henni frá málinu. Við nánari eftirgrennslan hennar hafi komið í ljós að margir í unglingadeild skólans hafi séð myndina, bæði strákar og stelpur.

Stúlkan áttaði sig alls ekki á því að myndin færi í hendur svona margra. Hún segir félaga sinn hafa manað sig til að senda sér mynd og hún hafi að lokum látið undan þrýstingnum. Nokkrum dögum síðar hafi myndin verið komin í dreifingu meðal flestra unglinga í fjórum grunnskólum Akureyrar. Stúlkunni líði að sjálfsögðu mjög illa yfir eins og rétt sé hægt að ímynda sér.

Móðirin segir að stúlkan hafi orðið mjög hrædd við að fara út og verið hrædd að hitta þennan strák og vini hans, þar sem hún vissi ekki hvað þeir myndu segja við sig.

Stúlkan kveið fyrir því að fara í skólann eftir að hún áttaði sig á hversu margir hefðu séð myndina og hafði móðirin samband við skólann og þar hafi verið tekið afar vel á málum, það sé ómetanlegt. Umsjónarkennari bekkjarins fór yfir málið með bekkjarsystkinum stúlkunnar. Skólastystkini hennar hafi svo verið óskaplega góð við hana þegar hún mætti daginn eftir og þau hafi sýnt henni mikinn stuðning.

Jafnframt hafi verið rætt við alla nemendur unglingastigsins, bæði um þetta mál og almennt hvaða áhrif það geti haft, bæði það að senda svona myndir frá sér og að dreifa svona myndum sem krakkar komast yfir. Yfirmenn skólans höfðu samband við fleiri skóla í bænum og fóru fram á það að þeir sem hefðu myndina í fórum sér myndu eyða henni og stoppa dreifingu hennar.



Hafa tilkynnt lögreglu um málið

„Við foreldrarnir höfum talað við lögregluna sem áframsendir málið til barnaverndar, þar sem fjallað verður um málið og ákveðið verður með framhaldið,“ segir móðirin.

Hún vill koma því á framfæri við foreldra og aðra að fræða börnin sín um þessar hættur, það sé ekki nóg að koma í veg fyrir samskipti barna sinna við ókunnuga. Börn og unglingar verða að gera sér grein fyrir því að svona myndir og það sem þau segja á netinu verður alltaf til ef enginn eyðir því og það sé vont að vera allt í einu kominn í þá stöðu að ráða ekki hverjir skoða og hverjir senda myndir af manni sjálfum.

Post by Lögreglan á höfuðborgarsvæðinu.