Umfjöllun, viðtöl, einkunnir og myndir: Fram - ÍBV 0-1

Skrautlegt mark varnarmannsins Matt Garner dugði fyrir ÍBV gegn Fram á Laugardalsvellinum í kvöld. ÍBV komst með sigrinum upp að hlið Vals í deildinni.

Fyrri hálfleikur var ansi bragðdaufur svona heilt yfir. Heimamenn byrjuðu þó betur og komust í ágætis færi. Guðjón Orri Sigurðsson, markmaður ÍBV, varði vel á þeim kafla en hann kom inn í lið Eyjamanna í fjarveru David James.

Ber þar helst að nefna dauðafæri sem Haukur Baldvinsson fékk eftir frákast af vörslu Guðjóns en skot hans fór í varnarmann. Almarr Ormarsson átti fyrra skotið sem var fast og Guðjón þurfti að hafa sig allan fram við að verja.

Næstu mínútur voru frekar daufar.  Það breyttist á 32. mínútu en þá kom fyrsta og eina  mark leiksins. Gestirnir buðu upp á það og var það ansi skrautlegt. Matt Garner átti þá fast skot langt fyrir utan teig sem fer í  Framarann, Halldór Arnarsson, og í autt markhornið.

Ögmundur, markmaður Fram, var mættur í hitt hornið og hefði að öllum líkindum varið skotið frá Garner en boltinn rúllaði hægt í hitt hornið. Svekkjandi fyrir Framara.

Eyjamenn héldu forystunni allan leikinn og seinni hálfleikur var tilburðalítill sömuleiðis. Framarar settu smá pressu á ÍBV á lokamínútunum en það vantaði upp á gæðin til þess að klára færin.

Viktor Bjarki Arnarsson, miðjumaður Fram, fékk rauðaspjaldið á 90. mínútu eftir að hafa fengið tvö gul með tveggja mínútu millibili. Klaufalega gert hjá reynslumiklum leikmanni.

Gregg Oliver: Fyrstu tíu mínúturnar voru á tæpasta vaði hjá okkur

Gregg Oliver Ryder var þjálfari Eyjamanna í kvöld í fjarveru Hermanns og David James.

„ Við erum ánægðir eftir þennan leik og okkur fannst við eiga góðan leik. Fyrstu tíu mínúturnar voru á tæpasta vaði hjá okkur en mér fannst við spila góðan bolta á löngum köflum,“ sagði Gregg Oliver Ryder.

„Við erum virkilega glaðir með þennan sigur. Það má segja að þetta hafi verið heppni í markinu en ef maður skýtur ekki á markið að þá skorar maður ekki,“ sagði Gregg þegar hann var spurður út í markið sem ÍBV skoraði í leiknum.

„Guðjón var mjög góður í markinu og varði virkilega vel á köflum. Reynslan sem David James hefur komið með inn á æfingasvæðið er greinilega að borga sig,“ sagði Gregg að lokum.

Ríkharður: Á meðan það er tölfræðilegur möguleiki berjumst við áfram

„Við fengum sjö eða átta tilraunir á fyrstu 25. mínútunum en nýtum ekki færin okkar. Þá bíður maður hættunni heim og það var sem gerðist. Við fáum á okkur rosalega ódýrt mark og náðum ekki að koma okkur inn í leikinn aftur. Við vorum ekki góðir í seinni hálfleik,“ sagði fyrverandi landsliðsmaðurinn og þjálfari Fram, Ríkharður Daðason, ósáttur eftir leikinn.

„Við höfum sagt það í nokkrar umferðir núna að við þurfum stig og eftir því sem leikjunum líður að drögumst við nær og nær hættusvæðinu. En ef að úrslitinn koma á móti okkur að þá erum við komnir á fullu inn í þetta,“

„Á meðan það er tölfræðilegur möguleiki berjumst við áfram,“ sagði Ríkharður að lokum.

Brynjar Gauti: Við vorum lengi í gang

„Ég er ánægður með þrjú stig út úr þessum leik. Þetta var ekki fjörugasti leikur sem ég hef spilað en við settum eina markið í leiknum og héldum hreinu. Það er nóg,“ sagði Snæfellingurinn, Brynjar Gauti Guðjónsson, eftir leikinn.

„Það sást kannski aðeins í upphafi leiks að við vorum búnir að vera í lengri leikjapásu. Við vorum lengi í gang. Við héldum boltanum ekki nógu vel og þetta var opinn leikur. Framarar fengu sín færi þá en sem betur fer nýttu þeir þau ekki,“ sagði Brynjar Gauti og bætti við:

„Guðjón er búinn að standa sig mjög vel í þeim leikjum sem hann hefur spilað í sumar og er farinn að gera tilkall til þess að verða markmaður númer eitt,“ sagði hinn brosmildi Brynjar að lokum.