Einstaka leikir í lokaumferðinni gætu farið fram á laugardeginum

Sú staða gæti komið upp að félög í Pepsi-deild karla í knattspyrnu ættu þess kost að spila leiki sína í lokaumferðinni á laugardegi en ekki sunnudegi.

Lokaumferðin átti upphaflega að fara fram laugardaginn 28. september. Í dag var greint frá því á heimasíðu KSÍ að gera hefði þurft viðamiklar breytingar á leikjatilhögun í síðustu umferðunum.

Birkir Sveinsson, mótastjóri KSÍ, staðfesti í samtali við Fréttablaðið að ástæða þess að lokaumferðinni hefði verið frestað til sunnudags væri leikjaálag KR-inga. Vesturbæingar eiga eftir að spila sex leiki og fara þeir fram á átján dögum samkvæmt núgildandi leikjatilhögun.

KR-ingar eiga leik gegn Víkingi Ólafsvík fimmtudaginn 12. september. Við taka leikir á sunnudegi, fimmtudegi og sunnudegi áður en kemur að leik gegn ÍA sem fresta þurfti síðastliðinn sunnudag vegna vallaraðstæðna á Skaganum.

Sá leikur er nú tímasettur síðdegis fimmtudaginn 26. september. Í kjölfarið var lokaumferðinni frestað um einn dag, frá laugardeginum 28. september til sunnudagsins 29. september, svo ÍA og KR fengju tvo daga í hvíld.

Ljóst er að leikmenn og stuðningsmenn félaga í efstu deild höfðu margir hugsað sér að skemmta sér á laugardagskvöldinu og fagna lokum tímabilsins. Sá möguleiki gæti verið fyrir hendi að sögn Birkis en þó ekki hjá Fram og Fylki sem mæta KR og ÍA á sunnudeginum.

„Önnur félög gætu hugsanlega fært sig fram á laugardaginn svo framarlega sem úrslit í þeim leikjum hafi ekki áhrif á leikina sem ættu eftir að fara fram á sunnudeginum.“

Birkir segir að það muni ekki koma í ljós fyrr en að lokinni 21. umferðinni. Þá verði að vonast til að haustlægðirnar verði knattspyrnumönnum hliðhollar næstu vikur svo ekki þurfi að gera frekari breytingar.

Til hliðsjónar má nefna að lokaumferð Pepsi-deildar kvenna fer fram mánudagskvöldið 16. september.