Landspítalinn kominn í þrot

Læknar á Landsspítalanum segja spítalann kominn í þrot og grípa þurfi  til aðgerða nú þegar til að styrkja starfsemi hans. Skipulag spítalans bitni á sjúklingum og starfsfólki.

Læknar komu saman til fundar fjölmenns fundar í húsakynnum læknafélaganna í Kópavogi í gærkvöldi. Friðbjörn Sigurðsson lyflæknir á Landsspítalanum segist ekki muna eftir svo fjölmennum fundi hjá læknum sem ekki fjallaði um kjaramál, enda sé þungt í læknum.

„Eins og kemur fram í ályktuninni sem samþykkt var á fundinum í gær, þá teljum við að Landsspítalinn sé kominn í þrot. Og við teljum ákaflega mikilvægt að stjórnvöld og stjórnendur sjúkrahússins  átti sig á að svo sé og viðurkenni þennan vanda því það er grundvöllur þess  að við getum farið að byggja upp að nýju.,“ segir Friðbjörn.

Friðbjörn segir vandann ekki eingöngu efnahagskreppuni að kenna, hann sé miklu víðtækari.

„Eitt málið eru t.d. húsnæðismál sjúkrahússins. Þegar sjúkrahúsin voru sameinuð fyrir meira en áratug síðan  var það forsenda sameiningarinnar að starfsemin yrði flutt í eitt hús,“ segir Friðbjörn.

Starfsfólk sjúkrahússins hafi verið að bíða eftir nýjum spítala í öll þessi ár og öll skipulagsmál og þróun starfsemi sjúkrahússins hafi verið stopp á meðan og vandamálin hrannast upp.

„Margir hérna innanhúss eru orðnir vonlitlir um að það verði til nýr spítali á næstunni og að það verði núna að gera kostnaðarsamar breytingar . Það verði að flytja bráðastarfsemi sjúkrahússins á einn stað,“ segir Friðbjörn.

Lyflækningar hafi t.d. farið sérstaklega illa út úr því að vera staðsett í mörgum húsum en hún sé nú á Landakoti, í Fossvogi og á Hringbraut. Þetta hefti alla samvinu lyflækna og samvinnu við aðrar heilbrigðisstéttir.

Bitnar það á sjúklingunum?

„Vissulega, því það er verið að þeyta sjúklingum fram og til baka, sem gerir alla þjónustu við þá miklu, miklu lakari,“  segir Friðbbjörn Sigurðsson lyflæknir.