Játuðu að hafa afklætt og rakað hár af fórnarlambi sínu

Fjórar konur játuðu í Héraðsdómi Reykjavíkur í morgun grófa líkamsárás og að hafa rakað hár af fórnarlambi sínu. Konurnar réðust á aðra konu í janúar á síðasta ári á heimili í Mosfellsbæ.

Konan var sofandi þegar þær réðust á hana. Konurnar slógu hana ítrekað í andlitið og rökuðu svo af henni mest allt hárið með rafmagnsrakvél sem ein þeirra hafði tekið með sér. Eftir árásina neyddu þær konuna til þess að afklæðast og hótuðu henni frekara ofbeldi. Við það fór fórnarlambið úr öllum fötum nema brjóstahaldara.

Konurnar mættu fyrir dómara í morgun og játuðu allar sök þegar þær voru spurðar út í ákæruatriðin. Allar mótmæltu þær þó bótakröfu fórnalambsins.

Konurnar vildu koma því sérstaklega á framfæri að þær sæju eftir árásinni. „Ég er búin að reyna allt til þess að fá númerið hjá henni," sagði ein þeirra á meðan hinar sögðust iðrast gjörða sinna. Ákveðið var að sleppa aðalmeðferð í málinu. Það þýðir að málsatvik verða ekki reifuð sérstaklega með vitnum og sakborningum. Málflutningur lögmanna fer fram eftir um tvær vikur.