Gengi breska pundsins í frjálsu falli

Breska pundið hefur verið í frjálsu falli á alþjóðlegum gjaldeyrismörkuðum frá því um áramótin. Gengi pundsins hefur fallið um 10% gangvart krónunni á þessum tíma. Þetta eru góðar fréttir fyrir þá sem fara sem ferðamenn héðan til Bretlands. Að sama skapi eru þetta afleitar fréttir fyrir þá sem selja fisk á mörkuðum eins og í Grimsby og Hull því þeir tapa á gengisfalli pundsins. Um áramótin kostaði pundið rúmar 207 krónur. Í dag er það komið niður í 187 krónur. Í frétt um þróunina á gengi pundsins í Berlinske Tidende segir að breska pundið hafi verið sú mynt sem mest var skortseld í síðasta mánuði á eftir japanska jeninu. Með skortsölunni er verið að veðja á veikingu gengisins.Í frétt Berlingske kemur fram að frá árinu 1975 hafi pundið aðeins einu sinni áður verið veikara gagnvart dönsku krónunni en það er nú um stundir.