Skógræktin neitar hjólhýsaeigendum um rafmagn

Skógrækt ríkisins hefur neitað eigendum í hjólhýsabyggðinni í Þjórsárdal um að fá rafmagn í húsin að sögn Eysteins Georgssonar hjólhýsaeiganda á svæðinu.

Landið sem hjólhýsin eru á eru í eigu ríkisins og bendir Eysteinn á að í öðrum hjólahýsabyggðum til dæmis á Laugavatni og á Flúðum sé rafmagn í boði í fyrir húsin. Á Laugavatni sé jafnframt nánast bannað að nota gas. Þar eru hjólhýsabyggðirnar í eigu sveitarfélaganna.

Eysteinn telur að rafmagn væri mun betri kostur fyrir hjólhýsaeigendurna en gas. Hann gefur lítið fyrir þá kenningu Hreins Óskarssonar, skógarvarðar hjá Skógrækt ríkisins á Suðurlandi. Að það yrði ekki endilega til bóta út frá öryggissjónarmiðum að notast við rafmagn en gas. 

Eysteinn telur að rafmang sé mun öruggari kostur en gas alla jafna og að flestir vildu frekar nota rafmagn.

Eigendur hjólhýsanna vilja leggja rafmagn að hjólhýsum sínum en Hreinn sagði í viðtali við Fréttablaðið í gær að ekki hefði verið farið út í slíkar aðgerðir af þeirri einföldu ástæðu að slíkt yrði of kostnaðarsamt.

Bæði Skógrækt ríkisins og Eysteinn hafa kannað hvað kostar að leggja rafmagn og sögðu Hreinn og Eysteinn í samtali við Vísi í dag að kostnaðurinn væri um 100 þúsund krónur fyrir hvert hús. Eysteinn sagði jafnframt að hann væri til í að greiða þessar 100 þúsund krónur sjálfur ef ríkið leyfði að leggja rafmagn á svæðinu.

Í fréttum stöðvar 2 í gær var viðtal við Hörð Bjarnason sem lengi hefur flutt inn hjólhýsi og kom fram í máli hans að hann teldir ástandi hjólhýsa oft ábótavant. Eysteinn efast um að þessi maður þekki nokkuð til svæðisins í Þjórsárdal og segir engan sem hann hefur rætt við hafa heyrt á manninn minnst áður.

En tekur þó undir með honum varðandi það að mun öruggara sé að leggja rafmagn í hjólhýsi en að hafa gas. Eysteinn er jafnframt hlynntur frekari reglum og eftirliti með hjólhýsabyggðinni, enda sé það vilji hans og líklega flestra að geta dvalið öruggur á staðnum.