Jón Baldvin mun ekki kenna við Háskóla Íslands

Jón Baldvin Hannibalsson, fyrrverandi utanríkisráðherra verður ekki gestafyrirlesari hjá Háskóla Íslands í vetur eins og fyrirhugað var. Þetta var ákveðið á fundi í Háskólanum síðdegis.

Greint var frá því nýverið að Jón Baldvin myndi kenna námskeið í vetur um smáþjóðir og hvernig þeim farnast í alþjóðakerfinu. Jón kenndi sambærilegt námskeið við Alþjóðamálastofnun háskólans í Vilníus í Litháen. Ráðningin sætti töluverðri gagnrýni í kjölfarið, meðal annars í pistli sem birtist á vefnum Knúz.is sem Helga Þórey Jónsdóttir og Hildur Lilliendahl Viggósdóttir skrifuðu. Þar voru birtir úrdrættir úr ósæmilegum bréfum sem Jón Baldvin skrifaði Guðrúnu Harðardóttur, systurdóttur eiginkonu sinnar fyrir rúmum áratug. Þau komu fyrst fyrir sjónir almennings í tímaritinu Nýju Lífi í fyrra og vöktu mikla athygli.

Í tímaritinu kom einnig fram að Jón hafi, árið 2005 verið kærður fyrir kynferðisbrot gegn Guðrúnu. Ríkissaksóknari lét málið niður falla í mars 2007. Jón viðurkenndi við yfirheyrslur hjá lögreglu vegna málsins að hann hafi farið yfir strikið í skrifum sínum og sýnt af sér dómgreindabrest.

Ljóst má vera að sú gagnrýni sem sett var fram í kjölfar ráðningar Jóns til Háskólans hafi haft sitt að segja í því að hún var dregin tilbaka. Daði Már Kristófersson, forseti félagsvísindadeildar sagði í samtali við fréttastofu að á fundi Háskólans  í dag hafi heildarhagsmunir skólans verið metnir og fyrrnefnd ákvörðun tekin í kjölfarið. Að öðru leyti vildi hann ekki tjá sig um ástæður þess að ráðning Jóns var dregin tilbaka.

Jón Baldvin vildi heldur ekkert tjá sig um málið þegar eftir því var leitað í dag.