Fordæmir matvælaframleiðendur

Formaður Bændasamtaka Íslands segir að þegar matvælaframleiðendur svindli í framleiðslu sinni séu þeir að svíkja tvo hópa, bændur og neytendur. Hann fordæmir vinnubrögð þeirra matvælaframleiðenda sem Matvælastofnun gerði athugasemdir við í síðustu viku.

Í kjölfarið á stóra hrossakjötshneykslinu í Evrópu tók Matvælastofnun sextán matvörur sem eru framleiddar hér á landi til rannsóknar. Stofnunin gerði athugasemd við þær allar, merkingar á flestum vörunum voru rangar og eins og komið hefur fram fannst ekkert nautakjöt í nautabökum. Haraldur Benediktsson formaður Bændasamtaka Íslands segir bændur vera sára yfir þessum svikum.

Búnaðarþing stendur nú yfir og segir Haraldur málið vera tekið fyrir þar. Hann segir að eftir því sem keðjan er lengri á milli bóndans og neytandans geti svona svik komið upp.

Haraldur segir bændur undirgangast gæðaflokkun á kjöti t.d séu lömbin flokkuð í marga verðflokka í sláturhúsinu en allt selt sem dilkakjöt út í búð, þá megi velta fyrir sér hvað verði um allt kýrkjötið.

Sif Jónsdóttir bóndi og búnaðarþingsfulltrúi segir svik matvælaframleiðenda við bændur og neytendur grafalvarlegt mál og bændur verði að tryggja stöðu sína sem grunnframleiðendur.

Rætt var við Harald og Sif í kvöldfréttum Stöðvar 2 í kvöld.