25-40 Íslendingar gætu óafvitað verið með HIV-veiruna

Íslenskur lyflæknir og smitsjúkdómasérfræðingur segir að miðað við erlendar tölur og rannsóknir gætu verið um fjörutíu Íslendingar smitaðir af HIV-veirunni án þess að vita af því.

Töluvert hefur verið fjallað um stúlkubarn sem fæddist smituð af HIV-veirunni vestanhafs á dögunum. Barnið var aðeins annað tilfellið í sögunni þar sem tókst að vinna fullkomlega bug á veirunni þótt fjölmargir smitaðir lifi góðu og eðlilegu lífi.

Bryndís Sigurðardóttir, lyflæknir og smitsjúkdómasérfræðingur á LHS, ræddi nýlegar fréttir og HIV-veiruna í þættinum Reykjavík Síðdegis á Bylgjunni í dag.

„Við erum með gagnagrunn á Landspítalnum sem við notum og uppfærum í samráði við Norðurlöndin. Við erum með svona 180 virka sjúklinga í þessum gagnagrunni en það eru líka útlendingar. Þetta eru vel yfir 100 Íslendingar. 70-80% þeirra eru á lyfjum og gengur vel miðað við langflesta," segir Bryndís.

Hún segir erlendar rannsóknir segja að um fjórðungur þeirra sem smitaðir séu af HIV-veirunni viti ekki af því. Það sé líklega algengara í vanþróaðri löndum en séu tölurnar yfirfærðar á íslenskt samfélag má leiða að því líkum að allt að 25-40 einstaklingar og jafnvel fleiri séu smitaðir af HIV-veirunni hér á landi án þess að vita það.

Hægt er að hlusta á viðtalið við Bryndísi í spilaranum hér fyrir ofan.