Fékk á annað hundrað þúsund króna símreikning eftir netvafur

Íslendingur sem notaði snjallsíma í Bandaríkjunum til að fara á netið fékk á annað hundrað þúsund króna reikning fyrir um tuttugu mínútna notkun. Slík mál koma reglulega upp að sögn forstjóra Tals sem hvetur Íslendinga á faraldsfæti til að huga betur að internetstillingum í tækjum sínum.

Það var DV sem greindi fyrst frá máli Rúnars Pálmarssonar, sem notaði nýjan iphone til að vafra á netinu þegar hann var í heimsókn hjá tengdaforeldrum sínum í Boston.

„Og er semsagt búin að vera þarna í þrjá daga þegar ég ákveð að setja inn netstillingarnar hjá Tal og ég hef greinilega misst samband við heimanetið. Og eftir tuttugu mínútur þá fæ ég sms: þú hefur notað 8 þúsund af heildarmagni 10 sem hægt er að nota og 2 mínútum seinna fæ ég seinna sms-ið þar sem stendur að ég hafi fullnýtt 10 þúsund króna heimild og til að fylla á þurfi ég að senda sms til að hækka, ég á ekki að geta notað meira en 10 þúsund nema ég hækki með sms-i. Sem ég geri ekki," segir Rúnar.

Rúnar rak svo upp stór augu þegar símreikningurinn kom í hús, því tuttugu mínútna netrúntur, þar sem hann skoðaði meðal annars íslenskar fréttasíður og facebook, kostaði heilar 129 þúsund krónur. Hann segist mjög ósáttur við símafyrirtækið Tal vegna þessa en forstjóri þess bendir hins vegar á að þetta geti komið fyrir því erlendir samstarfsaðilar eiga það til að skila gögnum seint til fyrirtækisins.

Viktor Ólason, forstjóri Tals, segir netnotkun vera mjög dýra erlendis. Margir Íslendingar hafi brennt sig á þessu og fengið himinháan reikning líkt og Rúnar. Rætt var við Viktor og Rúnar í kvöldfréttum Stöðvar 2 í kvöld.