Umfjöllun og viðtöl: Stjarnan - Fylkir 1-2 | Fylkismenn áfram á sigurbraut

Fylkir vann Stjörnuna 2-1 á Samsung-vellinum í kvöld og vann þar með sinn þriðja deildarsigur í röð. Komu gestirnir ákveðnir til leiks og voru heilt yfir betri í leiknum og verðskulduðu því stigin þrjú.

Fylkismenn byrjuðu leikinn af nokkrum krafti og var það verðskuldað þegar þeir náðu forystu með fínu marki Andrésar Más á 8. mínútu. Andrés tók hornspyrnu frá vinstri. Stjörnumenn hreinsuðu boltann úr teignum þaðan sem skot kom af löngu færi. Boltinn fór í varnarmann og barst út á kant á til Andrésar. Hann lagði boltann fyrir sig og snéri hann fallega upp í skeytin fjær. Óverjandi skot og verðskulduð forysta.

Leikurinn var nokkuð fjörugur eftir þetta. Bæði liðin fengu sín færi og áttu Fylkismenn bæði skot í þverslá og í stöng. Var það því gegn gangi leiksins þegar Stjarnan jafnaði á lokasekúndum fyrri hálfleiks. Kennie Chopart geystist upp hægri kantinn eftir að Stjarnan hafði unnið boltann. Kom hann boltanum fyrir markið þaðan sem boltinn barst út úr teignum. Þar var mættur fyrirliði Stjörnunar Daníel Laxdal sem lagði boltann fallega innan fótar í hornið fjær. Fylkismenn tóku miðju og Örvar Sær dómari flautaði samstundis til hálfleiks.

Stjarnan hóf síðari hálfleik af nokkuð meiri krafti en Fylkismenn og var að sjá að markið hefði sett gestina út af laginu. Bæði lið fengu þó sín færi og fékk Halldór Orri leikmaður Stjörnunar sannkallað dauðafæri þegar hann komst einn á móti markmanni Fylkismanna eftir frábæra sendingu frá Atla Jóhannssyni. Halldór Orri skóflaði boltanum einhvern veginn framhjá og gott tækifæri Stjörnunar til að ná forystu farið forgörðum. Örfáum mínútum síðar, á 68. mínútu, fengu Fylkismenn vítaspyrnu sem þeir skoruðu úr og náðu forystu á ný, sem þeir héldu til leiksloka. Fyrirgjöf frá hægri og svo virtist sem Baldvin Sturluson hafi klifrað upp á bak Viðars Arnar Kjartanssonar beint fyrir framan Örvar Sæ, sem átti fínan dag með flautuna, og benti hann á vítapunktinn í kjölfarið. Finnur Ólafsson tók vítaspyrnuna og skoraði.

Eftir þetta var sótt á báða bóga. Stjarnan setti Tryggva Bjarnason inn á í sóknina og hóf að spyrna fram löngum boltum ætluðum Tryggva. Úr því varð ekkert markvert fyrr en á 92. mínútu þegar Tryggvi féll við og gerði tilkall til vítaspyrnu. Vildi hann meina að hann hafi verið togaður niður. Dómarinn var ágætlega staðsettur og hristi hausinn. Ekkert víti og leikurinn var flautaður af skömmu síðar.

Logi Ólafsson: Fengum besta færi leiksins í stöðunni 1-1Þjálfari Stjörnumanna Logi Ólafsson var að vonum svekktur að leik loknum.

„Það er alltaf slæmt að tapa og sérstaklega þegar það gerist með þessum hætti að við náum okkur engan veginn á strik, hvorki í vörn né sókn. Í stöðunni 1-1 fengum við sennilega besta færi leiksins en náum ekki að nýta það. Eftir að við lendum undir er þetta orðið erfitt og sennilega með slakari leikjum okkar í sumar” sagði Logi eftir leikinn.

Hann vildi ekki bara kenna um þreytu sinna manna, sem hafa spilað stíft undanfarið, heldur hafi liðið verið að taka rangar ákvarðanir, ekki náð takti í spilið og of langt verið á milli leikmanna.

„Eigum við ekki að segja að í besta falli hafi þetta ekki verið okkar dagur” sagði hann að lokum.



Ásmundur Arnarson: Ekki hægt annað en að vera sáttur„Þetta er erfiður völlur að koma á og Stjarnan er með frábært lið. Þetta var sterkur en að mínu mati sanngjarn sigur” sagði Ásmundur Arnarson þjálfari Fylkis eftir leik.

„Í fyrrihálfleik vorum við mun betri og ég hefði viljað setja fleiri mörk. Í staðinn færum við þeim mark á silfurfati. Ég er því gríðarlega ánægður með mína menn að hafa komið inn í síðari hálfleik og tekið stigin þrjú sem voru í boði”.



Viðar Örn Kjartansson: Vorum miklu betri í þessum leik„Þetta var bara klaufaskapur í okkur að vera ekki með forystu í hálfleik en við vorum brjálaðir í klefanum og komum inn í síðari hálfleik og kláruðum þetta verðskuldað” sagði Viðar Örn Kjartansson framherji Fylkis að leik loknum.

„Það eru gæði í liðinu. Við erum að verjast vel og nýta færin á réttum tíma. Við erum einnig með nýja leikmenn sem eru að koma vel inn í þetta og liðið er komið með sjálfstraust” sagði hann jafnframt og vildi meina að sigurinn hefði verið enn sætari í ljósi gríðarlega svekkjandi taps Fylkismann gegn Stjörnunni í bikarnum fyrr á þessu tímabili, þar sem Stjarnan jafnaði í uppbótartíma og vann svo leikinn í framlengingu.