Frestar friðlýsingu

Sigurður Ingi Jóhannsson, umhverfis – og auðlindaráðherra hefur ákveðið að  undirrita ekki skilmála um aukna friðlýsingu Þjórsárvera í dag eins og til stóð. Þetta stangast á við yfirlýsingu sem umhverfis – og auðlindaráðuneytið sendi frá sér í gær.

Í yfirlýsingunni kom fram að skilmálinn yrði undirritaður í dag, en Sigurður Ingi sá ástæðu til að endurskoða friðlýsinguna vegna athugasemda sem ráðuneytinu bárust frá Landsvirkjun í gær. Þar kemur fram að Landsvirkjun hafi ekki fengið upplýsingar um afstöðu til athugasemda og að nauðsynlegt sé að samþykki fyrirtækisins liggi fyrir þegar eigi að friðlýsa á grundvelli náttúruverndarlaga.

Árni Finnson hjá Náttúruverndarsamtökum Íslands gagnrýnir ákvörðun Sigurðar Inga harðlega.

„Þetta er fordæmalaus uppákoma. Um er að ræða svæði sem er í verndarflokki samkvæmt rammaáætlun og Landsvirkjun hefur engar athugasemdir gert við þá samþykkt alþingis að Þjórsárver væri í verndarflokki. Núna er greinilegt að Landsvirkjun vill færa Þjórsárver í nýtingaflokk. Þá má segja að Landsvirkjun hafi rofið þann frið sem hefur náðst um þessa rammaáætlun,“ segir Árni.

Unnið hefur verið að stækkum friðlandsins í Þjórsárverum samkvæmt náttúruverndaráætlun 2009- 2013.  Með stækkuninni  hefði friðlandið farið úr 375 ferkílómetrum í  1.563.