Segir ummæli ráðherra um Teigsskóg koma sér á óvart

Pétur Gunnlaugsson verkfræðingur segir viðhorf innanríkisráðherra um að leggja veg um Teigsskó koma sér á óvart. Hann ætli sér að berjast áfram fyrir verndun svæðisins.

Hanna Birna Kristjánsdóttir innanríkisráðherra sagði í samtali við Fréttablaðið í dag að hún væri hlynnt vegi um Teigsskóg á sunnanverðum Vestfjörðum.

Áður hefur verið deilt hart um framkvæmdina sem var kærð árið 2006 og lyktaði með sigri landeiganda og hagsmunaaðila í Hæstarétti árið 2009. Svæðið er meðal annars talið einastakt að því leytinu til að þarna er fjögur hundruð hektarar af birkiskógi auk þess sem varpland arna er nærri.

Meðal þeirra sem sóttu málið hvað harðast var Pétur Gunnlaugsson, landeigandi á svæðinu. Hann hefur óskað eftir fundi með innanríkisráðherra.

„Við munum bara berjast áfram, það er bara þannig," segir Pétur um ummæli ráðherrans. Aðspurður hvort það sé viðbúið að hann kæri málið fari svo að ákvörðun verði tekin um framkvæmdir, svara Pétur:

„Við erum búin að fara í gegnum tvö dómsstig áður, og hjá, ég geri ráð fyrir því að við munum að minnsta kosti skoða það,“ segir Pétur.

En hvað með Vestfirðinga sem vilja leggja veg um svæðið?

„Það þarf auðvitað að leggja veg þarna en það eru aðrar veglínur sem eru betri og ódýrari,“ segir Pétur.

Spurður hvort málið komi honum á óvart svarar Pétur: „Ég veit það ekki. Já miðað við að þetta er búið að fara í gegnum tvö dómsstig, þá kemur mér á óvart að það eigi að setja sömu framkvæmdina aftur og aftur í umhverfismat bara til að fá hana í gegn,“ segir Pétur að lokum.

Fyrir áhugasama má nálgast niðurstöðu Hæstaréttar í málinu frá árinu 2009 hér.